एजेन्सी – अलराउन्डर सिकन्दर राजाको सानदार प्रदर्शनमा घरेलु टोली जिम्बावेले पहिलो टि२० आई खेलमा बंगलादेशलाई १७ रनले हराएको छ । योसँगै तीन टि२० आई खेलको सिरिजमा जिम्बावेले १–० को अग्रता लिएको छ ।

जितको लागि २ सय ६ रनको विशाल विजयी लक्ष्य पछ्याएको बंगलादेशले निर्धारित २० ओभरमा ६ विकेट गुमाउँदै १ सय ८८ रन बनायो । नुरुल हसनले २६ बलमा १ चौका र ४ छक्कासहित सर्वाधिक ४२ रन बनाए ।

ओपनर लिटन दास १९ बलमा ६ चौकासहित ३२, मुनिम शहरिअर ४, अनामउल हक २६ र अफिफ हुसैनले १० रनमा आउट भए । नाज्मुल हसन सान्टोले २५ बलमा ३ चौका र १ छक्कासहित ३७ रनमा आउट भए । जिम्बावेका ल्यूक जोंगवेले सर्वाधिक दुई विकेट लिए । सिकन्दर राजाले एक विकेट लिए ।

त्यसअघि हरारे स्पोर्ट्स क्लबमा टस जितेर पहिला ब्याटिङ गर्दै निर्धारित २० ओभरमा ३ विकेट गुमाउँदै २ सय ५ रन बनाएको थियो । जिम्बावेका सिकन्दर राजा २६ बलमा ७ चौका र ४ छक्कासहित ६५ रनको अविजित उत्कृष्ट इनिङ खेलेका थिए ।

मध्यक्रमका ब्याटर वेस्ली मधेभरेले ४६ बलमा ९ चौकासहित ६७ रनमा रिटायर्ट हर्ट भए । रेजिस चकभा ८, क्रेग इर्भिन २१ र सेन विलियम्स ३३ रनमा आउट भए । विलियम्सले १९ बलमा ४ चौका र १ छक्का प्रहार गरे ।

बंगलादेशका मुश्ताफिजुर रहमानले ४ ओभरमा ५० रन खर्चेर २ विकेट लिए । दोस्रो खेल आइतबार हुनेछ ।