एजेन्सी – तीव्र गतिका बलर टिम साउथी र ट्रेन्ट बोल्टको उत्कृष्ट बलिङमा न्युजिल्यान्डले दोस्रो ओडिआई खेलमा घरेलु टोली वेस्टइन्डिजलाई डकवर्थ लेविस पद्धतिको आधारमा ५० रनले पराजित गरेको छ । योसँगै तीन ओडिआई खेलको सिरिज १-१ को बराबरीमा पुगेको छ ।

बार्बाडोसमा टस हारेर पहिला ब्याटिङ गर्दै न्युजिल्यान्ड ४८.२ ओभरमा २ सय १२ रनमा अल आउट भएको थियो । न्युजिल्यान्डका ओपनर फिन एलेन १ सय १७ बलमा ७ चौका र ३ छक्कासहित सर्वाधिक ९६ रनमा आउट भए । डर्याल मिचेल ४१, मिचेल सान्टनर २६ र बोल्ट १६ रनमा आउट भए । अन्य ब्याटरले दोहोरो अंकमा रन छुन सकेनन् ।

वेस्टइन्डिजका स्पिनर केभिन सिन्क्लेयरले ८.२ ओभरमा ४१ रन खर्चेर ४ विकेट लिए । जेसन होल्डरले ९ ओभरमा २ मेडनसहित २४ रन खर्चेर ३ विकेट लिए । अकिल हुसैनले दुई विकेट लिए ।

वर्षाको कारण वेस्टइन्डिजले ४१ ओभरमा जितको लागि डकवर्थ लेविस पद्धतिको आधारमा २ सय १२ रनको लक्ष्य पाएको थियो । उक्त विजयी लक्ष्य पछ्याएको वेस्टइन्डिज ३५.३ ओभरमा १ सय ६१ रनमा अल आउट भयो ।

वेस्टइन्डिजका आठौं नम्बरका ब्याटर यानिक करियाहले ८४ बलमा २ चौका र १ छक्कासहित सर्वाधिक ५२ रन बनाए । दशौं नम्बरका ब्याटर अल्जारी जोशेफले ३१ बलमा ५ चौका र २ छक्कासहित ४९ रन बनाए ।

बोल्ट र साउथीले सुरुवातमा वेस्टइन्डिजलाई ९.३ ओभरमा २७–६ को अवस्थामा पुर्याउँदै जितको आधार तय गरेका थिए । ७२–८ को अवस्थामा पुगेको थियो । नवौं विकेटका लागि यानिक र जोशेफले ८५ रनको साझेदारी गर्दै साख जोगाए । वेस्टइन्डिजका अन्य कुनैपनि ब्याटरले राम्रो प्रदर्शन गर्न सकेनन् ।

न्युजिल्यान्डका टिम साउथीले ७ ओभरमा १ मेडनसहित २२ रन खर्चेर ४ विकेट लिए । बोल्टले ६ ओभरमा १ मेडनसहित १८ रन खर्चेर ३ विकेट लिए । पहिलो खेलमा वेस्टइन्डिज ५ विकेटले विजयी भएको थियो । तेस्रो तथा निर्णाय खेल आइतबार हुनेछ ।