काठमाडौं (हाम्रो खेलकुद) – नेपालले तेस्रो तथा अन्तिम एकदिवसिय अभ्यास खेलमा आज केन्यासँग खेल्दैछ । खेल नेपाली समय अनुसार दिउँसो १२ : १५ मा नैरोबीमा रहेको जिमखान क्लब मैदानमा सुरुहुनेछ ।

एक खेल अगावै सिरिज जितेको नेपाल क्लिनस्विप गर्ने सोचमा हुनेछ । केन्या अन्तिम खेलमा जितका साथ सिरिजमा क्लिनस्विप हुनबाट बच्न चाहन्छ । नेपाल पहिलो खेलमा ७ विकेट र दोस्रो खेलमा १७ रनले विजयी भएको थियो ।

पहिलो खेल सहज जिताउन ओपनर आसिफ शेखले १ सय १० रन र अर्जुन साउदले ६१ रनको इनिङ खेलेका थिए । दोस्रो खेलमा नेपालले आसिफ शेखलाई विश्राम दिँदै देव खनाललाई मौका दिएको थियो । दोस्रो खेल जिताउन कप्तान रोहित पौडेलले ७८ रनको कप्तानी इनिङ खेलेका थिए ।

नेपालले सिरिज जिति सकेको खण्डमा आज मौका नपाएका खेलाडीलाई अवसर दिनसक्छ । युवा अलराउन्डर विवेक यादव र तीव्र गतिका बलर किशोर महतोलाई मौका दिनसक्छ । यी दुई खेलाडीलाई नेपालले खराब प्रदर्शन गर्दै आएका पवन सरार्फ र दीपेन्द्रसिंह ऐरीलाई विश्राम दिँदै मौका दिनसक्छ । त्यस्तै आरिफ शेख र आसिफ शेख दुबैलाई आजको खेलमा मौका दिनसक्छ ।

नेपालको तीव्र गतिको बलरमा सोमपाल कामी र करण केसी छन् । नेपालले एक बलरलाई विश्राम दिनसक्छ । ज्ञानेन्द्र मल्ल, देव खनाल र रोहित पौडेलको प्रदर्शन महत्वपूर्ण हुनेछ ।

केन्याका राकिप पटेल, इफरान करिम र कोलिन्स ओबुयाले राम्रो प्रदर्शन गर्दै आएका छन् । राकिप पटेलले दोस्रो खेलमा ८१ रनको इनिङ खेल्दै एक समय नेपाललाई दबाबमा राखेका थिए ।

यी तीन ब्याटरको प्रदर्शनमा केन्याको योगफल निर्धारण हुनेछ । स्पिनर विरज पटेलले लगातार राम्रो प्रदर्शन गर्दै आएका छन् । कप्तान शेम न्गोचेले पनि मध्यक्रममा विकेट लिँदै नेपाललाई दबाबमा राख्दै आएका छन् ।

नेपालले केन्यासँगको पाँच टि२० आई सिरिज भने ३–२ ले जितेको थियो । टि२० आई सिरिजपछि सन्दीप लामिछाने भने क्यारेवियन प्रिमियर लिग (सिपिएल) खेल्न वेस्टइन्डिज गएका छन् । त्यसैको कारण उपकप्तान रोहित पौडेलले एकदिवसिय अभ्यास खेलमा नेपालको कप्तानी गरेका छन् ।