काठमाडौं (हाम्रो खेलकुद) – नेपालले तेस्रो तथा अन्तिम एकदिवसिय अभ्यास खेलमा केन्यासँग टस हारेर पहिला फिल्डिङ गर्ने भएको छ । नैरोबीमा रहेको जिमखान क्लब मैदानमा केन्याका कप्तान शेम न्गोचेले टस जितेर पहिला ब्याटिङ गर्ने निर्णय लिएका छन् ।

नेपालले आजको खेलमा करण केसीलाई विश्रमा दिएको छ । करणको स्थाना नेपालले किशोर महतोलाई मौका दिएको छ । त्यस्तै पवन सरार्फको स्थानमा आसिफ शेखलाई मौका दिएको छ । एक खेल अगावै सिरिज जितेको नेपाल क्लिनस्विप गर्ने सोचमा हुनेछ । केन्या अन्तिम खेलमा जितका साथ सिरिजमा क्लिनस्विप हुनबाट बच्न चाहन्छ । नेपाल पहिलो खेलमा ७ विकेट र दोस्रो खेलमा १७ रनले विजयी भएको थियो ।

पहिलो खेल सहज जिताउन ओपनर आसिफ शेखले १ सय १० रन र अर्जुन साउदले ६१ रनको इनिङ खेलेका थिए । दोस्रो खेलमा नेपालले आसिफ शेखलाई विश्राम दिँदै देव खनाललाई मौका दिएको थियो । दोस्रो खेल जिताउन कप्तान रोहित पौडेलले ७८ रनको कप्तानी इनिङ खेलेका थिए ।

केन्याका राकिप पटेल, इफरान करिम र कोलिन्स ओबुयाले राम्रो प्रदर्शन गर्दै आएका छन् । राकिप पटेलले दोस्रो खेलमा ८१ रनको इनिङ खेल्दै एक समय नेपाललाई दबाबमा राखेका थिए । नेपालले केन्यासँगको पाँच टि२० आई सिरिज भने ३–२ ले जितेको थियो । टि२० आई सिरिजपछि सन्दीप लामिछाने भने क्यारेवियन प्रिमियर लिग (सिपिएल) खेल्न वेस्टइन्डिज गएका छन् । त्यसैको कारण उपकप्तान रोहित पौडेलले एकदिवसिय अभ्यास खेलमा नेपालको कप्तानी गरेका छन् ।

नेपालको प्लेइङ ११ :

रोहित पौडेल (कप्तान), अर्जुन साउद (विकेटकिपर), आसिफ शेख, दीपेन्द्रसिंह ऐरी, आदिल अन्सारी, किशोर महतो, ज्ञानेन्द्र मल्ल, सोमपाल कामी, साहब आलम, बसिर अहमद र देव खनाल ।