एजेन्सी – टि२० एसिया कप २०२२ च्याम्पियन श्रीलंका टोलीको स्वदेशमा भब्य स्वागत भएको छ । फाइनलमा पाकिस्तानलाई हराउँदै च्याम्पियनका साथ श्रीलंका फर्केको टोलीको भब्य स्वागत गरेको छ ।

शहर परिक्रमा गराउँदै श्रीलंका क्रिकेट बोर्डले भब्य स्वागत गरेको हो । श्रीलंका क्रिकेट टोली उपाधि जितेर मंगलबार स्वदेश फर्किएपछि एर्पोट देखिनै भब्य स्वागत भएको छ ।

आइतबार फाइनलमा पाकिस्तानलाई २३ रनले हराउँदै श्रीलंकाले २०१४ पछि एसिया कपको उपाधि जितेको थियो। श्रीलंकाले २०१४ को एसिया कप र टि२० विश्वकपपछि पहिलो पटक अन्तर्राष्ट्रिय उपाधि जितेको हो ।

भारतले सर्वाधिक ७ पटक एसिया कप जितेको छ । श्रीलंकाले ६ र पाकिस्तानले दुई पटक उपाधि जितेको छन् । श्रीलंकाले पहिलो पटक सन् १९८६ मा पाकिस्तानलाई ५ विकेटले हराउँदै उपाधि जितेको थियो । १९९७ मा भारतलाई फाइनलमा ८ विकेटले हराउँदै जितेको थियो ।

२००४ र २००८ मा भारतलाई नै लगातार हराउँदै उपाधि जितेको थियो । पछिल्लो पटक २०१४ को एसिया कपमा पाकिस्तानलाई नै ५ विकेटले हराउँदै उपाधि जितेको थियो ।

श्रीलंकाले २०१४ को टि२० विश्वकपको फाइनलमा भारतलाई ६ विकेटले हराउँदै च्याम्पियन बनेको थियो । त्यसपछि भने अन्तर्राष्ट्रिय क्रिकेटमा श्रीलंकाले लगातार खराब प्रदर्शन गर्दै आएको थियो ।

२०१५ को एकदिवसिय विश्वकपमा क्वाटरफाइनल र २०१९ को एकदिवसिय विश्वकपमा श्रीलंका पहिलो चरणबाटै बाहिरिएको थियो ।

२०१६ र २०२१ को टि२० विश्वकपमा पनि श्रीलंका दोस्रो चरणबाटै बाहिरिएको थियो । एसिया कप २०१६ र २०१८ मा पनि श्रीलंका खराब प्रदर्शन गर्दै बाहिरिएको थियो ।