एजेन्सी – युएईले आइसिसी वुमन्स टि२० विश्वकप छनोटमा टेस्ट टोली जिम्बावेलाई ४ विकेटले हराएको छ । समूह बी को पुछारमा रहेको युएईले अन्तिम बलमा शीर्ष स्थानको जिम्बावेलाई स्तब्ध पारेको हो ।

जितको लागि १ सय २१ रनको विजयी लक्ष्य पछ्याएको युएईले निर्धारित २० ओभरमा ६ विकेट गुमाउँदै पूरा गर्यो । अन्तिम ६ बलमा युएईलाई जितको लागि १४ रन चाहिँएको थियो । नोम्वेलो सिबांडाले पहिलो बलमा दुई रन खर्चिन् ।

दोस्रो र तेस्रो बलमा एक एक रन दिइन् । चौथो बल डट राखेकी थिइन् । अन्तिम २ बलमा १० रन चाहिँएको थियो । पाँचौं बल वाइडसहित चार रन खर्चिन् । लगत्तै अर्को बलमा दुई रन खर्चिन् । वैष्णव महेशले अन्तिम बलमा चौका हान्दै खेल जिताइन् ।

युएईकी कविशा इगोेडागे ५७ बलमा ३ चौकासहित सर्वाधिक ४१ रनमा अविजित रहिन् । ईशा ओझा २६ बलमा ३ चौका र २ छक्कासहित ३६ रनमा आउट भइन् । विजयी चौका हानेकी महेश ५ बलमा ९ रनमा अविजित रहिन् । जिम्बावेकी लोरेन त्सुमा र प्रिसियोस मारेन्जले दुई दुई विकेट लिए ।

त्यसअघि आबुधाबीमा टस जितेर पहिला ब्याटिङ थालेको जिम्बावेले निर्धारित २० ओभरमा ७ विकेट गुमाउँदै १ सय २० रन बनायो । जिम्बावेकी शार्न मेयर्सले २३ बलमा ४ चौकासहित सर्वाधिक २३ रन बनाइन् । मोडेस्टर मुपाचिका २३ बलमा १ चौकासहित २२ रनमा अविजित रहिन् । युएईकी महेशले ४ ओभरमा १५ रन खर्चेर ३ विकेट लिइन् । खुशी शर्माले ४ ओभरमा ३१ रन खर्चेर २ विकेट लिइन् ।

समूह ए बाट बंगलादेश र आयरल्यान्ड सेमिफाइनलमा पुगेका छन् । बंगलादेश ३ खेलमा अपराजित रहँदै शीर्ष स्थानमा रह्यो । आयरल्यान्ड तीन खेलमा २ मा जितका साथ दोस्रो स्थानमा रह्यो । स्कटल्यान्ड दुई अंक र अमेरिका अंक विहीन हुँदै बाहिरिए ।
समूह बी मा जिम्बावे ३ खेलमा २ मा जित र १ मा हारसहित शीर्ष स्थानमा रह्यो । थाईल्यान्ड ३ खेलमा २ मा जित सहित दोस्रो स्थानमा रह्यो । पपुवा न्युगिनी र युएई समान २ अंकका साथ तेस्रो र चौथो स्थानमा रहेर बाहिरिए ।

पहिलो सेमिफाइनलमा बंगलादेश र थाईल्यान्डबीच प्रतिस्पर्धा हुनेछ । अर्को सेमिफाइनलमा जिम्बावे र आरल्यान्डबीच प्रतिस्पर्धा हुनेछ । सेमिफाइनल शुक्रबार र फाइनल आइतबार हुनेछ । फाइनलमा पुग्ने दुई टोली आगमी वर्ष दक्षिण अफ्रिकामा हुने टि२० विश्वकपको लागि छनोट हुनेछन् । नेपाल भने एसिया क्षेत्रैबाट बाहिरिएको थियो ।