काठमाडौं (हाम्रो खेलकुद) – तीव्र गतिकी बलर अश्मिना कर्माचार्यको कप्तानीमा बागमती प्रदेशले नवौं राष्ट्रिय खेलकुद अन्तर्गत महिला क्रिकेट प्रतियोगितालाई १४ सदस्य टोली घोषणा गरेको छ ।

त्यस्तै अलराउन्डर सुमन खतिवडालाई भने बागमतीले उपकप्तानको जिम्मेवारी दिएको छ । घोषणा टोलीमा अश्मिना, सुमन, कन्चन श्रेष्ठ, आरती बिडारी र खुशी डंगलोल लगायतका खेलाडी छन् ।

सुमन र अश्मिनाको प्रदर्शनमा धेरै निर्भर रहनेछ । सिनियर टोलीमा १३ औं दक्षिण एसियासली खेलकुद (साग) पछि नभएकी सुमन घरेलु प्रतियोगितामा सानदार प्रदर्शनका साथ पूनरागमन गर्ने सोचमा हुनेछिन् ।

नवौं खेलकुद असोज २८ देखि कार्तिक ३ सम्म पोखरामा हुँदैछ । तर महिला क्रिकेट भने असोज २३ देखि हुने बताइएको छ । यता पुरुषतर्फ क्रिकेट भने काठमाडौंमा सम्पन्न भई सकेको छ ।

नेपाल पुलिस क्लबले त्रिभुवन आर्मी क्लबलाई ८ विकेटले हराउँदै नवौंको पहिलो स्वर्ण जितेको थियो । तर वर्षाको कारण २९ मध्य १८ खेल हुन सकेनन् । बागमती प्रदेश र नेपाल एपिएफ क्लब भने एक खेल पनि खेल्न नपाई बाहिरिएका थिए ।

बागमतीको टोली :

अश्मिना कर्माचार्य (कप्तान), सुमन खतिवडा (उप-कप्तान) विन्दा कटुवाल, बिपीशा, कन्चन श्रेष्ठ, अनिशा मजाकोटी, सोनी पाख्रिन, अस्मिता खरेल, आरती विडारी, कृष्मा गुरुङ, खुसी डंगोल, सलिना सिलवाल, संस्कृति फुँयाल र हेलिशा गुरुङ ।

वैकल्पिक :

साविका कुमारी यादव, श्वइच्छा खड्का, अनुशा रोका र क्यानुका बस्नेत ।