एजेन्सी – विश्व टि२० क्रिकेटका सर्वाधिक सफल ब्याटर क्रिस गेलले भारतमा जारी लेजेन्ड्स लिग क्रिकेटमा गुजरात जायन्ट्सबाट भिलवारा किंग्सविरुद्ध उत्कृष्ट ब्याटिङ गरेका छन् । गेलको अर्धशतकमा गुजरातले किंग्सलाई १ सय ८७ रनको बलियो लक्ष्य दिएको छ ।

जोधपुरमा टस हारेर पहिला ब्याटिङ थालेको गुजरातले निर्धारित २० ओभरमा ६ विकेट गुमाउँदै १ सय ८६ रन बनायो ।गुजरातका क्रिस गेलले ४० बलमा ९ चौका र ३ छक्कासहित सर्वाधिक ६८ रनको योगदान दिए । ४३ वर्षीय गेललाई किंग्सका शेन वाटसनले १४ औं ओभरको चौथो बलमा युसुफ पठानबाट क्याच गराएका थिए ।

आक्रामक ब्याटिङ गर्नेक्रममा गेलले युसुफ पठानलाई एकै ओभरमा तीन चौका र दुई छक्का हान्दै कुल २५ रन जोडेका थिए । आठौं ओभरको दोस्रो, तेस्रो र पाँचौं बलमा गेलले पठानलाई चौका हानेका थिए । चौथो र छैटौं बलमा छक्का हानेका थिए । त्यसपछि पठानले पुन बलिङ पाएनन् ।

ओपनर लेन्डन सिमन्सले १८ बलमा ५ चौकासहित २२ रन बनाए । कप्तान पार्थिव पटेल र केभिन ओ ब्रायन ४ रनमा आउट भए । यी दुबै युसुफ पठानको बलमा आउट भएका थिए । मध्यक्रमका यशपाल सिंह ३७ बलमा ६ चौका र २ छक्कासहित ५८ रन बनाए ।

थिसरा परेरा ११ बलमा १ चौका र १ छक्कासति १९ रनमा आउट भए । किंग्सका युसुफ पठानले २ ओभरमा ३४ रन खर्चेर २ विकेट लिए । श्रीसान्त, सुदीप त्यागी र शेन वाटसनले एक एक विकेट लिए ।