एजेन्सी – नेदरल्यान्ड्सले आइसिसी टि२० विश्वकपमा युएईमाथि तीन विकेटको रोमान्चक जित हात पारेको छ । जितको लागि १ सय १२ रनको विजयी लक्ष्य पछ्याएको नेदरल्यान्ड्सले १९.५ ओभरमा ७ विकेट गुमाउँदै पूरा गर्यो ।

नेदरल्यान्ड्सको जितमा म्याक्स ओडाउडले १८ बलमा ३ चौका र १ छक्कासहित २३ रनमा आउट भए । विक्रमजित सिंह १०, बास डि लिडे १४, कप्तान स्कट एडवार्ड्स १६ र टिम पिंग्ले १५ रन बनाए । युएईका जुनैद सुद्दिकले ४ ओभरमा २३ रन खर्चेर ३ विकेट लिए । बासिल हामिद, अयान अफ्जल, कार्तिक मयाप्पन र जहुर खानले एक एक विकेट लिए ।

त्यसअघि जिलोङमा टस जितेर पहिला ब्याटिङ थालेको युएईले निर्धारित २० ओभरमा ८ विकेट गुमाउँदै १ सय ११ रन बनाएको थियो । युएईका ओपनर मोहम्मद वासिमले ४७ बलमा १ चौका र २ छक्कासहित सर्वाधिक ४१ रन बनाए । ओपनर चिराग सुरी १२, कासिफ दाउद १५ र विकेटकिपर वित्य अरविन्दले १८ रन बनाए । अन्यले दोहोरो अंकमा रन बनाउन सकेनन् ।

नेदरल्यान्ड्सका बास डि लिडेले ३ ओभरमा १९ रन खर्चेर ३ विकेट लिए । फर्द क्लासेनले ४ ओभरमा १३ रन खर्चेर २ विकेट लिए । पहिलो खेलमा श्रीलंका भने नामिबियासँग ५५ रनले पराजित भयो ।

समूह ए मा नामिबिया २ अंकका साथ शीर्ष स्थानमा छ । नेदरल्यान्ड्स २ अंक भएपनि नेटरनरेटको कारण दोस्रो स्थानमा छ । युएई तेस्रो र श्रीलंका पुछारमा छ । नामिबियाले मंगलबार नेदरल्यान्ड्स र बिहीबार नामिबियासँग खेल्नेछ । श्रीलंकाले मंगलबार युएई र बिहीबार नेदरल्यान्ड्ससँग खेल्नेछ ।