पोखरा (हाम्रो खेलकुद) – खेलाडीको लागि चोट सबैभन्दा ठूलो दुश्मन हो । अझ नेपालमा त राम्रो उपचार पाउनै मुश्किल हुँदा चोटकै कारण थुप्रै खेलाडीको करिअरनै पूर्ण विराम लागेका थुप्रै उदाहरण छन् । उपचार भई हालेपनि फर्किने अवसर नपाउँदा धेरै कठिन पर्दै आएको छ ।

सामान्य चोटले पनि खेलाडीको बेवास्ता र हेलचेक्राइँले ठूलो नोक्सानी पुर्याउन सक्छ । नेपाली महिला क्रिकेट टोलीकी विष्फोटक ब्याटर डली भट्ट नवौं राष्ट्रिय खेलकुद अन्तर्गत महिला क्रिकेट प्रतियोगितामा सुदूरपश्चिमबाट बागमती प्रदेशविरुद्ध खेल्ने क्रममा घाइते भइन् । त्यसपछि उनी गण्डकी र सुदूरपश्चिमविरुद्ध मैदान बाहिर रहिन् ।

बायाँ हातको लिगामेन्टमा चोट लागेको उनलाई चिकित्सकले १५ दिन आराम गर्न भनेका थिए । स्वयं डली भट्टले पनि १५ दिन मै ठिक हुने बताएकी थिइन् । तर डली आफैंले डाक्टरको सुझाव लत्याएर मैदानमा उत्रने निर्णय लिइन् ।

आइतबार सुदूरपश्चिमविरुद्ध डली भट्ट धेरैलाई आश्चर्यमा पार्दै मैदानमा उत्रिइन् । सुदूरले मधेशसँगको खेलपछि यशु पाण्डेको स्थानमा डलीलाई नेपाल एपिएफ क्लबविरुद्ध मैदान उतारेको थियो । नेपाल एपिएफ क्लबसँग खेल्नुअघिनै सुदूरपश्चिम सेमिफाइनल दौडबाट बाहिरीसकेको थियो । त्यसैले यो खेल सुदूरको लागि प्रतिष्ठाको लडाईं मात्रै थियो ।

प्रतियोगिताको समिकरणका महत्त्व नभएको खेलमा डली करिअरनै जोखिममा राखेर मैदान उत्रिन् । उनी ब्याटिङ गर्न अन्तिम बलमा मात्रै मैदान छिरिन् । स्नेहा महरालाई इन्दु बर्माले बोल्ड गरेपछि अन्तिम बलमा क्रिजमा आएकी डलीले एक रन जोड्दै पेभेलिएन फर्किइन् ।

डलीले फिल्डिङ नगर्ने अनुमान गरिएको थियो । तर उनले बलिङ नै गरिन् । मध्य गतिमा बलिङ गरेकी उनले दोस्रो बलमै ज्योति पाण्डेलाई बोल्ड गरिन् । डलीले २ ओभरमा १२ रन खर्चेर १ विकेट लिइन् ।

सुदूरपश्चिमका व्यवस्थापक ज्ञानेन्द्र क्षेत्रीले चिकित्सक र डलीको आग्रहमै खेल्न दिएको बताए । ‘चिकित्सकको सल्लाह अनुसार उनलाई केहि दिनको विश्राम चाहिएको थियो । बायाँ हातमा ब्याटिङ गर्दा चोट लागेको थियो । उनले आज खेल्ने निर्णय गरिन् । जसले उसलाई रिफर गरेको थियो उहासँग हामीले सल्लाह गर्यौं । वहाँले खेल्दा हुन्छ भन्नुभएको थियो । त्यसैले खेलाएका थियौं’, क्षेत्रीले भने ।

व्यवस्थापक क्षेत्रीले आफूहरुले टोलीमा यसै नराखेको बताए । ‘हामीले खेलाएको होइन । हामीले जगत गुरुसँग सुझाव लियौं । चिकित्सकले हुन्छ भन्छ भने हामीले खेल्न दिन्छौं भनेका थियौं । उनले चिकित्सकसँग सोधेकी थिइन् । हुन्छ भनेपछि हामीले खेल्न दिएका हौं । फिट छ भनेपछि हाम्रो लागि त राम्रो कुरा हो । उनी राम्रो खेलाडी हुँदा टिमको लागि खेल्न सक्छिन्’, उनले भने ।

यता डलीले आफू खेल्न सक्ने हुँदा नै खेलेको बताइन् । ‘खासमा म हिजो (शनिबार) ब्रेकफास्ट गर्दा हात खुकुलो भइसकेको थियो । हाफ प्लास्टर मात्र हो, फुल होइन । मलाई सहज लागेको हुँदा आफैं हात खोलें । हिजो पुरै दिन मैले मुभमेन्टहरु गर्दा दुखाई पनि भएन । आफैं ब्यान्डेज किनेर मुभ लगाएर आफैं गरे । आज रातभई आइसिङ गरेपछि आफूलाई सहज लागेर नै खेलेको हो’, डलीले भनिन् ।

सुदूर बाहिरिसकेको अवस्थामा करिअरनै जोखिम मोल्नु आवश्यक थिएन । डली करिअर जोखिम भन्दा पनि आफूलाई सहज लागेपछि खेलेको बताइन् । ‘यो करिअरनै जोखिम भन्दापनि मेरो सहजको कुरा हो । मलाई कस्तो लागेको छ । अब चोट लाग्यो भने दैव जानोस् । ठिक छ जे हुनु भइसक्यो । अब ४-५ दिनमा ठिक हुन्छ’, खेलपछि डलीले भनिन् ।

डली र व्यवस्थापको कुरामा भने केही अन्तर रहेको देखिन्छ । डली आफैंले उपचार गरेको बताउँदा व्यवस्थापकले भने चिकित्सकसँग सल्लाह लिएको बताउँछन् । डली आफैंले ४-५ दिन अझै ठिक हुन समय लाग्ने बताउँदै खेल्नु पक्कै राम्रो होइन ।

सुदूरपश्चिमले उपाधिनै जित्ने भएपनि खेल्न नहुने अवस्था थियो । किनभने डलीको करिअर भन्दा यो प्रतियोगिता महत्त्वपूर्ण थिएन । एक खेलको कारण लामो समय बाहिर बस्नुभन्दा नखेल्दा नै उचित निर्णय हुन्थ्यो । ब्याटिङ नै गर्न सक्ने भए अघि खेलेको भए हुन्थ्यो । तर डली एक बल मात्रै खेलिन् । डली विकेट नगएको हुँदा अघि आउन आवश्यक नपरेको बताइन् ।

त्यसै पनि डलीलाई नेपाली महिला क्रिकेटको आगमी भविष्यको रुपमा हेरिँदै आएको छ । उनको करिअर बल्ल सुरु भएको छ । नेपाली महिला क्रिकेटमा उनी डेढ दशक भन्दा बढी खेल्न सक्छिन् । किनभने एउटा खेल र प्रतियोगिता नखेल्दैमा सबै सकिने होइन ।

खेल स्तर हेर्दा डली घरेलु प्रतियोगिता नखेली पनि सिनियर टोलीको बन्द प्रशिक्षणमा पर्न सक्छिन् । मैदानबाहिर रहेका नेपाली क्रिकेट महिला टोलीका मुख्य प्रशिक्षक जगत टमटाले पनि उनले खेल्न नहुने तर्क राखेका थिए ।

डलीको एउटा सानो गल्तीले करिअरमा ठूलो धक्का लाग्न सक्थ्यो । एउटा प्रतियोगितामा बाहिर बस्दैमा केहि हुँदैन । तर यसै गल्तीको कारण एक दुई वर्ष बाहिर हुनु पर्यो भने त्यो डली मात्र होईन नेपाली महिला क्रिकेटलाई नै ठूलो घाटा हो । धन्न डलीलाई खेलको क्रममा थप चोट लागेन ।

डलीले जुन गल्ती गरिन् त्यो गल्ती अन्य खेलाडीले गर्नु हुन्न । चोट पूर्ण फिटभएपछि नै मैदान उत्रर्नुपर्छ । बरु केही दिन व साता नै किन ढिलो नहोस् । तर सानो गल्तीले लामो समय मैदान बाहिर रहनुपर्यो भने त्यो समय पछुतो गर्न बाहेक अन्य विकल्प हुनेछैन ।