काठमाडौं (हाम्रो खेलकुद) – कप्तान ज्ञानेन्द्र मल्ल प्रधानमन्त्री कप अन्तर्गत बागमती प्रदेश छनोटमा सर्वोत्कृष्ट खेलाडी चुनिएका छन् । शुक्रबार फाइनलमा मकवानपुरले ललितपुरलाई दुई रनले हराउँदै उपाधि जितेको छ ।

काठमाडौं समूह चरणबाट बाहिरिएपनि ज्ञानेन्द्र मल्लले एक शतक र दुई अर्धशतकसहित उत्कृष्ट प्रदर्शन गरेका थिए । ज्ञानेन्द्रले भक्तपुरविरुद्ध १ सय १३ रन, ललितपुरविरुद्ध ५९ र नुवाकोटविरुद्ध ५४ रन बनाएका थिए ।

ज्ञानेन्द्र नै प्रतियोगिता उत्कृष्ट ब्याटर चुनिए । ललितपुरका तीव्र गतिका बलर नन्दन यादव भने उत्कृष्ट बलर चुनिए । नन्दनले ललितपुरलाई फाइनल सम्म पुर्याउन उत्कृष्ट प्रदर्शन गरेका थिए ।

शुक्रबार माथिल्लो मुलपानी मैदानमा टस जितेर पहिला ब्याटिङ रोजेको मकवानपुरले निर्धाारित ४० ओभरमा ९ विकेट गुमाउँदै १ सय ५१ रन बनायो । मकवानपुरको लागि रामनरेश गिरीले २३, असिम श्रेष्ठले २१, गौरभ र विशाल फुँयाल २६–२६ रन बनाए ।
ललितपुरका लागि सूर्य तामाङले ८ ओभरमा ४ मेडनसहित १३ रन खर्चेर ४ विकेट लिए ।

हरिओम जोशी र शशांक अग्रवालले दुई दुई विकेट लिए । जितको लागि १ सय ५२ रनको विजयी लक्ष्य पछ्याएकाले ललितपुर ३५.१ ओभरमा १ सय ४९ रनमा अल आउट भयो । एक समय २६ ओभरमा १२२–६ को अवस्थामा रहेपनि त्यसपछि लगातार विकेट गुमाएको थियो ।

ललितपुरका आदिल खानले ७१ बलमा ६ चौका र २ छक्कासहित सर्वाधिक ५१ रन बनाएपनि टोलीको हार टार्न सकेनन् । आदिल बाहेक अन्यले राम्रो प्रदर्शन गर्न सकेनन् । मकववानपुरका राम नरेश गिरीले ८ ओभरमा १ मेडनसहित २८ रन खर्चेर ४ विकेट लिए । पियुष शर्माले ६.१ ओभरमा २ मेडनसहित २० रन खर्चेर ५ विकेट लिए ।

प्रधानमन्त्री कप कार्तिक १३ देखि २६ गते सम्म काठमाडौंमा हुने भएको छ । समुह ए मा नेपाल एपीएफ क्लब, त्रिभुवन आर्मी क्लब, गण्डकी प्रदेश, कर्णाली प्रदेश र सुदुरपश्चिम प्रदेश छन् ।

समुह बि मा नेपाल पुलिस क्लब, बागमती, लुम्बिनी, मधेश र प्रदेश एक छन् । पहिलो दिन टियुमा आर्मी र एपीएफबीच प्रतिस्पर्धा हुने छ । उता मुलपानीमा पुलिस र बागमती भिड्ने छन् ।