काठमाडौं (हाम्रो खेलकुद) – नाबालिकामाथि बलात्कारको आरोप लागेका सन्दीप लामिछानेलाई थप दुई दिन हिरासतमा राखेर अनुसन्धान गर्ने अनुमति काठमाडौं जिल्ला अदालतले दिएको छ।

अब प्रहरीले अनुसन्धान सकाएर प्रतिवेदन जिल्ला सरकारी वकिल कार्यालय काठमाडौंमा पेश गर्नेछ। त्यसपछि थुनछेकको बहस सुरु हुनेछ। असोज २० गते त्रिभुवन अन्तर्राष्ट्रिय विमानस्थलबाट पक्राउ गरेपछि पहिलोपटक असोज २४ गते पहिलो पटक सन्दीपलाई अदालतमा पेश गरिएको थियो।

२० गतेबाटै गणना हुनेगरी पहिलो पटक सात दिनको म्याद थप गरिएको थियो। दोस्रो पटक असोज २७ गते पाँच दिनको र गत बुधवार चार दिन हिरासतमा राख्न अदालतले अनुमति दिएको थियो। उनी विरूद्ध प्रहरी वृत गौशालामा भदौ २१ गते जाहेरी परेको थियो।

त्यसको केहि दिनमा काठमाडौं जिल्ला अदालतले सन्दीपविरुद्ध पक्राउ पुर्जी जारी गरेको थियो । नेपाल प्रहरीले भने झण्डै दुई साता उनीविरुद्ध डिफ्युज नोटिस जारी गरेको थियो ।

आफूविरुद्ध किटानी जाहेरी परेको जानकारी पाएपछि सन्दीपले सामाजिक सन्जालमार्फत आफू निर्दोष रहेको र कानुनी लडाइ लड्ने जनाएका थिए । राष्ट्रिय क्रिकेट टोलीका साथ सन्दीप भदौ ६ गते केन्या गएका थिए । उनी त्यहिबाट व्यवासायिक क्रिकेट खेल्नका लागि वेस्ट इन्डिज पुगेका थिए ।

केन्या जानु अघिल्लो दिन भदौ ५ गते आफूलाई बलत्कार गरेको भन्दै नाबालिगले किटानी जाहेरी दिएकी थिइन् । सन्दीपले आफूले न्याय पाउने र चाँडै देशका लागि क्रिकेट खेलमा फर्कने विश्वास लिएको पनि बताएका छन् ।