एजेन्सी – अष्ट्रेलियाले आइसिसी टि२० विश्वकपमा आज अफगानिस्तानसँग खेल्दैछ । खेल नेपाली समय अनुसार दिउँसो १: ४५ मा एडिलेड ओभलमा सुरुहुनेछ ।

साविक विजेता तथा घरेलु टोली अष्ट्रेलियालाई शीर्ष दुईमा रहँदै सेमिफाइनल खेल्न अफगानिस्थानमाथि फराकिलो जित हात पार्नुपर्ने हुन्छ । अष्ट्रेलियाको ४ खेलमा ५ अंक छ । न्युजिल्यान्ड र इंग्ल्यान्डको समान ४ खेलमा ५–५ अंकका साथ नेटरनरेटका कारण क्रमश : पहिलो दोस्रो स्थानमा छन् ।

न्युजिल्यान्डले पहिलोे खेलमा आज आयरल्यान्डसँग प्रतिस्पर्धा गरि रहेको छ । उता इंग्ल्यान्डले शनिबार श्रीलंकासँग खेल्नेछ । इंग्ल्यान्ड र न्युजिल्यान्ड विजयी हुँदा ७–७ अंक हुनेछ ।

न्युजिल्यान्डको नेटरनरेट प्लस २.२३३ छ । आजको खेलमा विजयी हुँदा झनै बढ्नेछ । इंग्ल्यान्डको नेटरनेट प्लस ०.५४७ छ । अष्ट्रेलियाको नेटरनरेट माइनस ०.३०४ छ । त्यसैले सेमिफाइनल खेल्न अष्ट्रेलियालाई सामान्य जित पर्याप्त नहुने देखिन्छ । अथवा न्युजिल्यान्ड र इंग्ल्यान्ड मध्य एक टोली पराजित हुनुपर्छ ।

विश्वस्तरिय स्पिनर राशिद खान, मुजिब उर रहमान र मोहम्मद नाबी रहेको अफगानिस्तानविरुद्ध अष्ट्रेलियाले फराकिलो जित निकाल्नुपर्छ । ओपनर डेविड वार्नर र आरोन फिन्चबाट विष्फोटक सुरुवात चाहन्छ । त्यसपछिका मिचेल मार्श, ग्लेन म्याक्सवेल, टिम डेविड, मार्कस स्टोइनिस र म्याथ्यु वेडले पनि विष्फोटक गर्दै विशाल योगफल बनाउनु पर्ने हुन्छ ।

अष्ट्रेलियाको सोच पहिला ब्याटिङ गर्दै विशाल योगफल बनाउँदै अफगानिस्तानलाई सस्तैमा रोक्ने हुनेछ । अथावा जति सक्यो कम योगफलमा रोक्दै छिटो पूरा गर्ने हुनेछ । अष्ट्रेलिया तीव्र गतिका बलर मिचेल स्टार्क, प्याट कमिन्स र जोश हेजलवुडले सानदार बलिङ गर्दै सस्तैमा अल आउट गर्नुपर्ने हुन्छ । स्पिनरमा एडम जाम्पाले निरन्तरता पाउनेछन् ।

यता अफगानिस्तान औपचारिक रुपमा बाहिरिएको छ । तर अन्तिम खेलमा सानदार प्रदर्शन गर्न चाहन्छ । त्यसको लागि तीन स्पिनरको प्रदर्शन महत्वपूर्ण हुनेछ । ओपनर रहमानउल्लाह गुरबाजको प्रदर्शन महत्वपूर्ण हुनेछ ।

उनी अष्ट्रेलिया बलरलाई घातक बन्न सक्ने ब्याटर हुन् । राम्रो आशा गरेका गुरबाज विश्वकपमा भने चल्न सकेका छैनन् । त्यस्तै नाजिबउल्लाह ज्रदान र इब्राहिम जद्रानको प्रदर्शन पनि महत्वपूर्ण हुनेछ ।

हेड टु हेड :

अफगानिस्तान र अष्ट्रेलियाबीच टि२० आईमा भने हालसम्म प्रतिस्पर्धा भएको छैन । पहिलो पटक भिड्न लागेका हुन् । अफगानिस्तानले अष्ट्रेलियासँग तीन आडिआई खेल खेलेको छ । जसमा तीनै खेलमा अफगानिस्तान पराजित भएको छ ।