काठमाडौं (हाम्रो खेलकुद)– राष्ट्रिय क्रिकेट टोलीका निलम्बित कप्तान सन्दीप लामिछानेविरुद्धको मुद्दामा बहस सकिएको छ । १७ वर्षीया नाबालिगमाथि बलात्कार गरेको आरोपमा सन्दीप असोज २० गते त्रिभुवन अन्तर्राष्ट्रिय विमानस्थलबाट पक्राउ परेका थिए ।

काठमाडौं जिल्ला अदालतमा शुक्रबार सरकारी वकिल कृष्णा भण्डारीले जवाफी बहससँगै बहस सकिएको हो । सन्दीपलाई पुर्पक्षका लागि थुनामा राख्ने कि धरौटीम रिहा गर्ने आदेश अदालतले आजै दिने सम्भावना रहेको बताइएको छ ।

बिहीबार प्रतिवादी सन्दीपको ८ जना वकिलहरूले बहस गरेका थिए । पीडित नाबालिगको पक्षबाट ७ जनाले बुधबार नै बहस गरिसकेका थिए । जसमा चार जना सरकारी वकिल र तीन जना अन्य वकिलहरूले बहस गरेका थिए। सरकारी वकिलको कार्यालयले सन्दीपविरूद्धको मुद्दा सोमबार अदालतमा दर्ता गरेको थियो ।

प्रहरीले कात्तिक ४ गते नै उनीविरूद्धको अनुसन्धान सकेर प्रतिवेदन कार्यालयमा बुझाएको थियो । सन्दीपविरूद्ध १७ वर्षीया किशोरीले जबरजस्ती करणी गरेको जाहेरीका आधारमा प्रहरीले अनुसन्धान गरेको थियो । सन्दीपले बलात्कार आरोप अस्वीकार गर्दै आएका छन् । उनको पक्षबाट बहस गर्नेले किशोरी नाबालिग नरहेको प्रमाण पेश गरेको बताएका थिए ।
२४ दिन प्रहरी हिरासतमा राखी कात्तिक १४ गते उनलाई जिल्ला अदालतमा जबरजस्ती करणी गरेको कसुरमा मुद्दा दायर गरिएको थियो ।