एजेन्सी – नेदरल्यान्ड्सले आइसिसी टि२० विश्वकप २०२२ मा दक्षिण अफ्रिकालाई सुपर १२ को समूह बाट सेमिफाइनलमा पुग्न १ सय ५९ रनको मध्यम लक्ष्य दिएको छ ।

एडिलेड ओभलमा टस हारेर पहिला ब्याटिङ थालेको नेदरल्यान्ड्सले निर्धारित २० ओभरमा ४ विकेट गुमाउँदै १ सय ५८ रन बनायो । नेदरल्यान्ड्सका कोलिन एकरम्यानले २६ बलमा ३ चौका र २ छक्कासहित सर्वाधिक ४१ रनमा अविजित रहे ।

ओपनर स्टिफन माइबर्ग ३० बलमा ७ चौकासहित ३७ र म्याक्स ओडाउड २९ रनमा आउट भए । मध्यक्रमका ब्याटर टम कपुरले १९ बलमा २ चौका र २ छक्कासहित ३५ रन जोडे ।

कप्तान स्कर्ट एडवार्ड्सले १२ रन बनाए । दक्षिण अफ्रिका तीव्र गतिका बलर एनरिच नोर्कियाले ४ ओभरमा १० रन खर्चेर १ विकेट लिए । स्पिनर केशव महाराजले ४ ओभरमा २७ रन खर्चेर २ विकेट लिए । एडेन माक्ररमले एक विकेट लिए ।

यस खेलमा विजयी हुँदा दक्षिण अफ्रिका सेमिफाइनलमा पुग्नेछ । आजनै पाकिस्तान र बंगलादेशबीच प्रतिस्पर्धा हुनेछ । भारतले जिम्बावेसँग खेल्नेछ । भारत विजयी हुँदा सेमिफाइनलमा पुग्नेछ । पराजित हुँदा बाहिरिने सम्भावना छ । सुपर १२ को समूह ए बाट न्यजिल्यान्ड समूह विजेता र इंग्ल्यान्ड उपविजेता हुँदै सेमिफाइनलमा पुगेका छन् ।