एजेन्सी – गतवर्ष इन्डियन प्रिमियर लिग (आइपिएल) च्याम्पियन गुजरात टाइटन्सले १६ करोड नेपाली रुपैयाँमा अनुबन्ध गरेको तीव्र गतिका बलर लोकी फर्गुसनलाई कोलकाता नाइट राइडर्सले २०२३ को लागि किनेको छ ।

गुजरातले न्युजिल्यान्डका तीव्र गतिका बलर लोकी फर्गुसन र अफगानिस्तानका रहमानउल्लाह गुरबाजलाई कोलकातालाई बेचेको हो । गुजरात च्याम्पियन बन्दा फर्गुसनले १३ खेलमा १२ विकेट लिएका थिए । उत्कृष्ट प्रदर्शन ४-२८ मा थियो ।

फर्गुसन २०१९ देखि २०२१ सम्म कोलकातामा नै थिए । गत वर्ष अक्सनमा गुजरातले फर्गुसनलाई १० करोड भारु(१६ करोड रुपैयाँ) मा किनेको थियो । रोयल च्यालेन्जर्स बेंगलोर, दिल्ली क्यापिटल्स, गुजरात र लखनउरुबीच अक्सनमा प्रतिस्पर्धा भएपछि महँगो मूल्य पाएका थिए । न्यूनतम मूल्य २ करोड भारु राखेपनि अक्सनमा महँगो मूल्य पाएका थिए ।

फर्गुसन तीव्र गतिसँगै डेथ ओभरका लागि उत्कृष्ट बलर चिनिन्छन् । उनी प्रति घण्टा १ सय ५० किलोमिटरको गतीमा बलिङ गर्न सक्ने खुबी भएका बलर हुन् ।

अफगानिस्तानका युवा विकेटकिपर गुरबाज भने गुजरातको टोलीमा भएपनि एक खेल खेल्न पाएका थिएनन् । उनलाई जेसन रोयको स्थानमा किनेको थियो । गुरबाजले पछिल्लो समय राम्रो प्रदर्शन गर्दै आएका छन् ।

यी दुई खेलको मूल्य भने खुलाईएको छैन । कोलकातामा टिम साउथी, उमेश यादव र प्याट कमिन्स लगायतका तीव्र गतिका बलर थिए । अव फर्गुसन थपिएका छन् ।

त्यस्तै रोयल च्यालेन्जर्स बेंगलोरले अष्ट्रेलियाका तीव्र गतिका बलर जेसन बेहरेनडोफलाई मुम्बई इन्डियन्सलाई बेचेको छ । आइपिएल २०२३ को मिनी अक्सन आगमी डिसेम्बर २३ मा हुनेछ ।