एजेन्सी – आइसीसी टि२० विश्वकप २०२२ अन्तर्गत फाइनलमा पाकिस्तानलाई हराउँदै इंग्ल्यान्डले उपाधि जित्यो । इंग्ल्यान्डले उपाधि जित्दा टोलीका मुख्य प्रशिक्षक म्याथ्यु मोटले भने दुर्लभ उपलब्धि हासिल गरेका छन् । उनले एकै वर्षमा दुई विश्वकप जित्ने सफलता आत्मसात गरे ।

सन् २०२२ जुन महिनामा इंग्ल्यान्डको सिमित ओभर क्रिकेट टोलीका प्रशिक्षकमा नियुक्त भएका मोटले यसअघि अप्रिलमा पनि विश्वकप जितेका थिए । अष्ट्रेलियाको महिला टोलीका प्रशिक्षक रहेका उनले महिला एकदिवसीय विश्वकप उपाधि जिताएका थिए ।

मोटले अष्ट्रेलियाली टोलीसँग रहेर महिला क्रिकेटमा सम्भव सबै सफलता हासिल गरेपछि पुरुष क्रिकेटतर्फ ध्यान दिने सोच बनाएका थिए । जुन महिनामा इंग्ल्यान्डले सिमित ओभर र टेस्ट क्रिकेटका लागि फरक प्रशिक्षक राख्ने योजनासँगै मोटलाई सेतो बलको प्रशिक्षक बनायो । टेस्ट क्रिकेटमा भने न्युजिल्यान्डका ब्रेन्डन मक्कुलम प्रशिक्षक छन् । उनको बाज-बल शैलीको पनि निकै चर्चा भएको छ ।

मोटले फाइनलअघि एसइएनसँग बोल्दै सहि समय र सहि ठाउँमा जाने आफ्नो रणनीति रहेको बताए । ‘प्रशिक्षण करिअरमा अरु मान्छेबाट धेरै सिक्न पाइन्छ र आफूबारे पनि बुझिन्छ । सहि समयमा सहि ठाउँ पुग्ने मेरो रणनीति छ,’ उनले भने ।

‘महिला क्रिकेटमा महिले उत्कृष्ट खेलाडीसँग काम गरें । अहिले इंग्ल्यान्डमा पनि राम्रो युगमा छु । अझ हाम्रो टोलीमा जोनी बेयरस्टो र जोफ्रा आर्चरको कमी छ । यसका बाबजुद हामीले राम्रो खेलिरहेका छौं,’ उनले भनेका थिए । इंग्ल्यान्डका कप्तान जस बटलरले पनि प्रशिक्षक मोटसँग मिलेर अझ सफलता रच्ने विश्वास रहेको बताएका थिए ।