एजेन्सी – अष्ट्रेलियाका तीव्र गतिका बलर तथा टेस्ट र ओडिआई कप्तान प्याट कमिन्सले इन्डियन प्रिमियर लिग (आइपिएल) २०२३ नखेल्ने घोषणा गरेका छन् ।

कमिन्सले सामाजिक सञ्जालमार्फत अन्तर्राष्ट्रिय ब्यस्तता र विश्वकपको कारण देखाउँदै नखेल्ने जनाएको छन् । कमिन्स आइपिएलमा कोलकाता नाइट राइडर्समा आबद्ध थिए । ‘मैले कठिन निर्णय लिएको छु । आगमी सिजनको आइपिएल गुमाउने छु । आगमी १२ महिना टेस्ट र ओडिआईले गर्दा अन्तर्राष्ट्रिय तालिका ब्यस्त छ । त्यसैले केहि विश्राम पनि लिन चाहन्छु । एसेज सिरिज र विश्वकप पनि छ’, कमिन्सले लेखेका छन् ।

कोलकाताले कमिन्सलाई गतवर्ष ७ करोड २५ लाख भारुमा किनेको थियो । २०२० मा भने कमिन्सलाई कोलकाताले कीर्तिमानी मूल्य १५ करोड ५० लाख भारुमा टोलीमा अनुबन्ध गरेको थियो ।

कमिन्स तीव्र गतिको बलिङसँगै तल्लोक्रममा आक्रामक ब्याटिङ गर्ने गर्दछन् । गतवर्ष आइपिलमा मुम्बईविरुद्ध १४ बलमै अर्धशतक हानेका थिए । कमिन्सले आइपिएलमा ४२ खेलमा ४५ विकेट लिएका छन् । ३ अर्धशतकसहित ३ सय ७९ रन बनाएका छन् ।

त्यस्तै इंग्ल्यान्डका विकेटकिपर साम बिलिंग्सले पनि आइपिएल २०२३ नखेल्ने जनाएका छन् । विलिंग्स गतवर्ष २ करोड भारुमा कोलकातामा अुबन्ध भएका थिए । साम बिलिंग्सले टेस्ट क्रिकेटमा ध्यान दिँदै इंग्ल्यान्डको घरेलु क्रिकेटमा केन्द्रित हुने जनाएका छन् ।