एजेन्सी – सनराइजर्स हैदराबादले इन्डियन प्रिमियर लिग(आइपिएल) २०२३ को लागि कप्तान केन विलियम्सन र निकोलस पुरनलाई टोलीबाट फुकुवा(रिलिज) गरेको छ ।

हैदराबादले दुई प्रमुख विदेशी खेलाडीलाई टिमबाट फुकुवा गर्ने निर्णय लिएको हो । हैदराबादले विलियम्सनलाई १४ करोड भारुमा किनेको थियो । आइपिएलमा ७६ खेल खेल्दा विलियम्सनले २ हजार १ सय १ रन बनाएका छन् ।

गतवर्ष हैदराबादले विलियम्सनलाई पहिलो रोजाईमा टोलीमा राखेको थियो । अफगानिस्तानका लेगस्पिनर राशिद खानलाई फुकुवा गर्दै गुजरात पठाएको थियो । तर पछिल्लो समय विलियम्सनको टि२० प्रदर्शनमा प्रश्न उठ्दै आएको छ । विश्वका वर्तमान समयका उत्कृष्ट कप्तान केन विलियम्सनलाई हैदराबादले फुकुवा गर्ने निर्णय लिएको हो ।

त्यस्तै वेस्टइन्डिजका कप्तान निकोलस पुरनलाई पनि टोलीबाट फुकुवा गरेको छ । पुरनलाई हैदराबादले १० करोड ७५ लाख भारुमा किनेको थियो । पुरनको भने प्रदर्शन राम्रो छैन । विकेटकिपर ब्याटर पुरनले पछिल्लो समय लगातार खराब प्रदर्शन गर्दै आएका छन् ।

त्यस्तै पन्जाब किंग्सले आफ्ना कप्तान मयंक अग्रवाललाई फुकुवा गर्ने भएको छ । शाहरुख खानलाई टोलीमै राख्ने जनाएको छ । पन्जाबले शिखर धवनलाई कप्तान बनाउने छ । राजस्थान रोयल्सले दक्षिण अफ्रिका ब्याटर रास्सी भान डर डुसेनलाई फुकुवा गर्ने भएको छ ।

न्युजिल्यान्डका ब्याटिङ अलराउन्डरलाई पनि फुकुवा गर्ने भएको छ । रोयल च्यालेन्जर्स बेंगलोरले ६ विदेशी खेलाडी ग्लेन म्याक्सवेल, वानिन्दु हसरंगा, जोश हेजलवुड, फिन एलेन, फाफ डु प्लेसिस र डेविड विल्लीलाई टोलीमै राख्ने भएको छ ।

आज खेलाडी रिटेन र लिलिजको अन्तिम दिन हो । मिनि अक्सन आगमी २३ डिसेम्बरमा हुनेछ ।