काठमाडौं (हाम्रो खेलकुद) – कप्तान रोहित पोडेल र दीपेन्द्रसिंह ऐरीको सानदार शतकमा नेपालले पहिलो एकदिवसीय अभ्यास खेलमा दिल्ली डिस्ट्रिक क्रिकेट एसोसियसनलाई ३ सय ४ रनको बिशाल लक्ष्य दिएको छ ।

टस जितेर पहिला ब्याटिङ थालेको नेपालले निर्धारित ५० ओभरमा ९ विकेट गुमाउँदै ३ सय ३ रन बनायो । नेपालका कप्तान रोहित पौडेल १ सय ३५ बलमा ११ चौका र १ छक्कासहित १ सय १३ रनमा आउट भए । दीपेन्द्रसिंह ऐरीले ६२ बलमा ८ चौका र ६ छक्कासहित १ सय ९ रनको विष्फोटक शतकीय इनिङ खेले । दीपेन्द्रले ५८ बलमै शतक हानेका थिए ।

खराब प्रदर्शन गरेपनि छैटौं विकेटका लागि रोहित र दीपेन्द्रले १ सय २० रनको सानदार शतकीय साझेदारी गरेका थिए । नेपालको सुरुवात सम्झन लायक रहेन । शीर्षक्रमका प्रमुख तीन ब्याटर खाता खोल्न नसकी आउट भए । ओपनर अर्जुन साउद, ज्ञानेन्द्र मल्ल र आसिफ शेख शून्यमा आउट भएका थिए ।

खराब सुरुवात गरेको नेपाललाई रोहित र हरिशंकर शाहले केहि इनिङ उकासेका थिए । हरिशंकर २९ बलमा २५ रन बनाउँदै आउट भए । कुशल भुर्तेल ३९ बलमा २१ रन बनाउँदै आउट भए ।

नेपालले आइसिसी विश्वकप लिग २ अन्तर्गत नामिबिया भ्रमण अघि भारतमा अभ्यास खेलेको हो । नेपालले शुक्रबार दिल्लीसँगनै दोस्रो अभ्यास खेल खेल्नेछ । आइतबार नामिबिया प्रस्थान गर्नेछ ।

नेपालको टोली :

रोहित पौडेल (कप्तान), आसिफ शेख, दीपेन्द्रसिंह ऐरी, कुशल भुर्तेल, ललित राजवंशी, सोमपाल कामी, सागर ढकाल, अर्जुन साउद, ज्ञानेन्द्र मल्ल, आरिफ शेख, गुलशन झा, करण केसी, हरिशंकर शाह र नन्दन यादव ।