काठमाडौं (हाम्रो खेलकुद) – तीव्र गतिका बलर आकाश चन्दको पाँच विकेटमा सुदूरपश्चिम प्रदेशले वाई वाई यू–१९ राष्ट्रिय प्रतियोगितामा लगातार दोस्रो जित हात पारेको हो । सुदूरले साविक विजेता लुम्बिनी प्रदेशलाई १ सय रनको फराकिलो अन्तरले हराउँदै लगातार दोस्रो जित हात पारेको हो ।

जितको लागि १ सय ८१ रनको विजयी लक्ष्य पछ्याएकोे लुम्बिनी २१ ओभरमा ८० रनमा अल आउट भयो । लुम्बिनीका ओपनर आकाश त्रिपाठीले २३ बलमा ४ चौकासहित सर्वाधिक २२ रन बनाए । सिनियर टोलीबाट खेलि सकेका देव खनाल १८ बलमा २ चौकासहित १३ रनमा आउट भए ।

एक समय लुम्बिनी ५.५ ओभरमा ३६–१ को अवस्थामा थियो । कैलाश ऐरको बलमा देव क्याच आउट भएका थिए । देव आउट भएपछि लुम्बिनीका कुनैपनि ब्याटर क्रिजमा टिक्न सकेनन् । कप्तान विशाल विक्रम केसी ९ र मनोज मगर ११ रनमा आउट भए । विशाल भुषाल, प्रज्वल थापा र नर सार्कीले खाता खोल्न सकेनन् ।

सुदूरपश्चिमका आकाश चन्दले ३ ओभरमा १३ रन खर्चेर ५ विकेट लिए । हेमन्त धामीले ८ ओभरमा ३७ रन खर्चेर ३ विकेट लिए । कैलाश ऐरले एक विकेट लिए ।

त्यसअघि मुलपानी क्रिकेट मैदानमा टस हारेर पहिला ब्याटिङको निम्तो पाएको सुदूर ४९.५ ओभरमा १ सय ८० रनमा अल आउट भएको थियो । सुदूरका दीपक बोहराले ७३ बलमा ८ चौकासहित सर्वाधिक ५४ रन बनाए । ओपनर दीपक बोहरा भने २४ बलमा ४ चौकासहित १७, विशाल ऐर १६, अनुराग सिंह ९, मिलन बोहरा १ र गजेन्द्र बोहरा १९ रनमा आउट भए ।

नरेन साउद १७, हेमन्त धामी १५, सुनिल चन्द र आकाश चन्दले ७–७ रन बनाए । विशाल विक्रम केसी ६ ओभरमा १ मेडनसहित २० रन खर्चेर ३ विकेट लिए । नर सार्की र निर्मल गुरुङले २ विकेट लिए । निर्मलले १० ओभरमा ५ मेडन राख्दै २० रन खर्चेका थिए ।

पहिलो खेलमा सुदूरले कर्णालीलाई पाँच विकेटले हराएको थियो । सुदूर ४ अंकका साथ शीर्ष स्थानमा छ । सुदूरले आइतबार गण्डकी प्रदेशसँग खेल्नेछ । लुम्बिनीको भने यो पहिलो खेल हो । लुम्बिनीले शनिबार कर्णालीसँग खेल्नेछ । ७ प्रदेश सहभागी प्रतियोगितामा सिंगल राउन्ड रोविनको आधारमा शीर्ष दुई टोली फाइनल खेल्नेछन् ।