दिपेन्द्र पोखरेल
इटहरी – बाउन्ड्री नाघेको बलमा चौका नदिएको भन्दै एपिएफले महिला क्रिकेटको फाइनल त्यागेपछि पूर्वाञ्चललाई महिला क्रिकेटमा विजेता घोषित गरिएको छ । ६४ रनको लक्ष्य पछ्याएको एपिएफले जितका लागि अन्तिम ९ बलमा जितका लागि ९ रन हान्नु पर्ने थियो । यस्तोमा क्रिजमा थिइन् रितु कनौजिया । सविता गौतमको बलमा उनले प्रहार गरेको बलले बाउन्ड्री नाघेको एपिएफको दाबी थियो ।
फिल्डर अप्सरा बेगमले चौका नभएको इशारा गरेपछि अम्पाएर चौका दिएनन् । त्यसपछि एपिएफले खेल बीचमा छोडेको थियो । एपिएफले त्यो चौका पाउनु पर्ने माग गरिरहने र अम्पायरहरुले दिन नमिल्ने बताएपछि खेल त्यत्तिकैमा टुंगिएको थियो । पटक पटकको आग्रह पछि पनि एपिएफ खेल्न नमानेपछि पूर्वाञ्चललाई विजेता घोषित गरिएको छ । पूर्वाञ्चलका खेलाडी खुसीयाली मनाइरहँदा एपिएफका खेलाडी भने एउटा कुनामा निराश भएर बसेका थिए ।
