काठमाडौं (हाम्रो खेलकुद) – दक्षिण अफ्रिकी बायाँ हाते तीव्र गतिकी बलर शड्ली भान सेल्किकले लुम्बिनी अल स्टार्सबाट नेपाल टि२० लिग खेल्ने भएका छन् ।

लुम्बिनीले आफ्नो विदेशी खेलाडीको रुपमा सेक्किकलाई सार्वजनिक गरेको छ । ३४ वर्षीय बायाँ हाते अलराउन्डर सेल्किकले ९७ प्रथम श्रेणी खेलमा २ सय ३९ विकेट लिनुको साथै २५ सय ९३ रन बनाएका छन् । त्यस्तै १ सय ११ लिष्ट ए मा १ सय ४४ विकेट लिनुको साथै ९ सय ४६ रन बनाएका छन् । सेल्किक तल्लोक्रममा राम्रो ब्याटिङ गर्ने गर्दछन् ।

उनले दक्षिण अफ्रिका इगल्र्स, फ्रि स्टेट र वेस्टर्न प्रोभिन्सबाट घरेलु क्रिकेट खेल्ने गर्दछन् । ४१ वर्षीय इंग्ल्यान्डका पिटर ट्रेगो लुम्बिनीका मुख्य प्रशिक्षकका रुपमा छन् । त्यस्तै मनोज कटवाल साहायक प्रशिक्षकको रुपमा छन् । नेपाल टि२० डिसेम्बर २३ देखि १० जनवरीसम्म टियु क्रिकेट मैदानमा हुनेछ । डबल राउन्ड रोविनको आधारमा हुने एनपिएलमा सबै ६ फ्रेन्चाइज टोलीले खेलाडी ड्राफ्टबाट लिएका छन् ।

लुम्बिनीमा विदेशी खेलाडीको रुपमा लाहिरु मिलान्था, काल्भिन स्याभेज, विपुल शर्मा, प्याट ब्राउन, रहकीम कर्नवाल र हरमीत सिंह थियो । नेपाल टि२० लिग सरेपछि केहि विदेशी खेलाडी परिवर्तन हुनेछन् । लुम्बिनीले पहिलो खेल फार वेस्ट युनाइटेडसँग खेल्दै सुरुवात गर्नेछ ।

लुम्बिनीको टोलीमा दीपेन्द्रसिंह ऐरी मार्की खेलाडीको रुपमा छन् । दीपेन्द्रसँगै अनिल कुमार शाह, कुशल भुर्तेल, गुलशन झा, सागर ढकाल, योगेन्द्रसिंह कार्की, किशोर महतो , तिलकराज भण्डारी, सुनिल धमला, आकाश चन्द र ईशान पाण्डे छन् ।