एजेन्सी – इन्डियन प्रिमियर लिग (आइपिएल) २०२३ को मिनी अक्सन शुक्रबार कोचीमा हुँदैछ । मिनी अक्सनबाट हरेक टोली आफ्नो टिम च्याम्पियन बनाउन सक्ने खेलाडी टोलीमा अनुबन्ध गर्न प्रयास गर्नेछन् । टिमको कमजोरी सुधार गर्ने यो नै हरेक फ्रेन्चाइज टोलीको लागि अन्तिम अवसर हो ।

अक्सनमा कुनैपनि फ्रेन्चाइज टोलीले चाहेर मात्रै हुँदैन । आफूसँग त्यही अनुसार बजेट पनि हुनुपर्छ । आइपिएल विश्व क्रिकेटकै सर्वाधिक लोकप्रिय फ्रेन्चाइज टि२० क्रिकेट प्रतियोगिता हो । जहाँ नाम र दाम दुबै छ । व्यावसायिक क्रिकेटमा लागेपछि आइपिएल खेल्ने धेरै खेलाडीको सपना हुन्छ ।

आइपिएलमा खेलाडीमाथि पैसाको वर्षा हुने गर्दछ । एक खेलाडी धेरै टिमलाई आवश्यक भयो भने अक्सनमा खेलाडीमाथि धनको वर्षा हुने गर्दछ । टोलीहरुलाई आवश्यक भएन भने स्टार खेलाडी पनि कम मूल्यमा खेल्नु पर्ने हुन्छ । आइपिएलमा अलराउन्डर खेलाडीलाई बढी प्राथमिकतामा फ्रेन्चाइज टोलीले राख्ने गर्दछन् । इतिहासको सर्वाधिक बढी मूल्य पनि अलराउन्डर खेलाडीले नै पाएका छन् ।

यस पटक अक्सनमा केहि विश्व स्टार अलराउन्डर छन् । उनीहरुमाथि पैसाको वर्षा नै हुने देखिन्छ । विशेषगरी विश्वकप विजेता इंग्ल्यान्डका खेलाडीमाथि मोटो रकम खर्चने सम्भावना रहेको छ । सबै फ्रेन्चाइज टोलीको आवश्यक र खेलाडीको प्रदर्शन हेर्दा आइपिएल मिनी अक्सन २०२३ मा धनको वर्षा हुन सक्ने पाँच खेलाडी यस प्रकार छन् ।

५. निकोल्स पुरन (विकेटकिपर)

वेस्टइन्डिजका विकेटकिपर निकोलस पुरन आक्रामक ब्याटरको रुपमा चिनिन्छन् । २७ वर्षीय पुरनले आफ्नो न्यूनतम मूल्य अक्सनमा २ करोड भारु राखेका छन् । पुरनलाई सनराइजर्स हैदराबादले १० करोड ७५ लाख भारुमा अनुबन्ध गरेको थियो ।

तर यस पटक कप्तान केन विलियम्सन र पुरन दुवैलाई फुकुवा गर्यो । पुरनलाई २०१७ मा मुम्बईले न्यूनतम ३० लाख भारुमा किनेको थियो । २०१९ देखि २०२१ सम्म पन्जाब सुपर किंग्समा ४ करोड २० लाख भारुमा खेलेका थिए ।

पुरन विकेटकिपर र विष्फोटक ब्याटरमा विकल्प हुन् । उनलाई मध्यक्रम र फिनिसरको भूमिकामा फ्रेन्चाइज टोलीले प्रयोग गर्न सक्छन् । केहि दिन अघि सम्पन्न आवुधाबी टि१० लिगमा सानदार प्रदर्शन गर्दै १० खेलमा ३ मा अर्धशतकसहित २३४.६९ को स्ट्राइकरेटमा ३ सय ४५ रन बनाएका थिए ।

टि२० विश्वकपमा सम्झन लायक प्रदर्शन गर्न नसकेपनि पुरनले पुन टि१० मा आफ्नो लय फर्काएका छन् । जसले गर्दा महँगो मूल्य पाउन सक्छन् ।

४.ह्यारी ब्रुक (ब्याटर)

इंग्ल्यान्डका युवा स्टार ह्यारी ब्रुकलाई आगमी विश्व क्रिकेटका सुपर स्टार हुन् । टि२० विश्वकप च्याम्पियन ह्यारी युवा पुस्ताका तीनै शैलीमा सानदार प्रदर्शन गर्दै आएका छन् । उनलाई इंग्ल्यान्डका पूर्व कप्तान केभिन पिटरसन र भारतीय विराट कोहलीसँग तुलना गरिन्छ ।

ब्रुकले अक्सनमा न्यूनतम मूल्य १ करोड ५० लाख भारु राखेका छन् । मध्यक्रमका भरपर्दा ब्याटर ब्रुकलाई किन्न धेरै फ्रेन्चाइज टोलीहरुबीच उच्च प्रतिस्पर्धा हुने अनुमान गरिएको छ । स्पिनर ब्रुकले धेरै राम्रो खेल्ने गर्दछन् । टि२० क्रिकेटमा मध्यक्रममा बढी स्पिनरनै प्रयोग हुने गर्दछ । २३ वर्षीय ब्रुकले २० खेलमा ३ सय ७२ रन बनाएका छन् ।

ब्रुक गत अक्टोबरमा पाकिस्तानसँग सात टि२० आई खेलको सिरिजमा २ सय ३८ रन बनाउँदै प्लेयर अफ द सिरिज बनेका थिए । पाकिस्तानसँगको जारी टेस्ट सिरिजमा उनले क्रमश : १५३, ८७, ९, १ सय ८ र १ सय ११ रनमा आउट भएका छन् । १ सय ५३ रनको इनिङ खेल्नेक्रममा उनले एकै ओभरमा छ बलमा ६ चौका हानेका थिए ।

अग्ला कदका ब्रुक ठूला सट र मध्यक्रमका भरपर्दा ब्याटर हुन् । भर्खका युवा खेलाडी हुँदा धेरै टोली उनलाई भविष्यलाई मध्यनजर गर्दै टोलीमा अनुबन्ध गर्ने अनुमान गरिएको छ । धेरै फ्रेन्चाइज टोलीलाई मध्यक्रमको म्याच विनर ब्याटर आवश्यक हुँदा महँगो मूल्य पाउने सम्भावना देखिन्छ ।

३. क्यामरन ग्रीन – अलराउन्डर

अष्ट्रेलिया युवा अलराउन्डर क्यामरन ग्रीनमाथि यस मिनी अक्सनमा धनको वर्षा हुने अनुमान देखिन्छ । ग्रीन तीव्र गतिको बलिङसँगै विष्फोटक ब्याटिङ गर्ने गर्दछन् । उनले ब्याटिङमा ओपनिङदेखि तल्लोक्रम सम्म खेल्न सक्छन् ।

गत सेप्टेम्बरमा भारतविरुद्ध ग्रीनले ३० बलमा ८ चौका र ४ छक्कासहित ६१ रनको विष्फोटक इनिङ खेलेपछि अष्ट्रेलियाले २ सय ९ रनको लक्ष्य चार बल अगाडिनै पूरा गरेको थियो ।

त्यसै सिरिजमा भारतविरुद्ध २१ बलमा ७ चौका र ३ छक्कासहित ५२ रनको विष्फोटक इनिङ खेले । त्यसक्रममा उनले १९ बलमै अर्धशतक हानेका थिए । अग्ला कदका ग्रीनले अष्ट्रेलियाको टेस्ट र ओडिआईमा लगातार सानदार प्रदर्शन गर्दै आएका छन् ।

२३ वर्षीय युवा अलराउन्डर ग्रीनले आफ्नो न्यूनतम मूल्य २ करोड भारु राखेका छन् । उनी तीव्र गतिमा पनि राम्रो बलिङ गर्ने गर्दछन् । अक्सनमा चेन्नई, हैदराबाद, पन्जाब, लखनऊ, राजस्थान, मुम्बईबीच कडा प्रतिस्पर्धा हुँदा उनले महँगो मूल्य पाउन सक्छन् ।

२.साम करन – अलराउन्डर

इंग्ल्यान्डलाई टि२० विश्वकप जिताउन नायक बनेका युवा अलराउन्डर साम करन आइपिएलमा महँगो मूल्यमा बिक्ने देखिन्छ । साम करनले अक्सनमा २ करोड भारु न्यूनतम मूल्य राखेका छन् ।

बायाँ हाते साम करन तीव्र गतिको बलिङसँगै तल्लोक्रममा राम्रो ब्याटिङ गर्दछन् । अघिल्लो महिना इंग्ल्यान्डले टि२० विश्वकप जित्दा साम करनले डेथ ओभरमा सानदार प्रदर्शन गर्दै प्रतियोगिताकै सर्वोत्कृष्ट खेलाडी चुनिएका थिए ।

करनले उक्त विश्वकपमा ६ खेलमा १३ विकेट लिएका थिए । फाइनलमा पाकिस्तानविरुद्ध ४ ओभरमा १२ रन खर्चेर ३ विकेट र सुपर १२ मा अफगानिस्तानविरुद्ध ३.५ ओभरमा १० रन खर्चेर ५ विकेट लिएका थिए ।

इंग्ल्यान्डको टोलीबाट साम करनले तीनै शैलीमा लगातार दमदार प्रदर्शन गर्दै आएका छन् । साम करनले पन्जाब किंग्स र चेन्नई सुपर किंग्सबाट आइपिएल खेलि सकेका छन् । २०१९ मा पन्जाबबाट दिल्लीविरुद्ध ह्याट्रिक नै गरेका थिए । २०२० मा उनी चेन्नई पुगेका थिए । धोनीले उनलाई केहि खेलमा ओपनरको रुपमा समेत मैदान उतारेका थिए ।

म्याच विनर करनलाई लिन सबै फ्रेन्चाइज टोलीबीच कडा प्रतिस्पर्धाको अनुमान गरिएको छ । अक्सनमा सर्वाधिक धेरै रकम भएको हैदराबादले त्यसको लाभ बढी लिन सक्छ । हैदराबादसँग ४२ करोड भारु बाँकी छ । पन्जाब, लखनउ, मुम्बई, चेन्नई र दिल्ली पनि अनुबन्ध गर्न हरप्रयास गर्ने देखिन्छ ।

१. बेन स्टोक्स– अलराउन्डर

इंग्ल्यान्डका सुपर स्टार बेन स्टोक्स यस अक्सनमा सबैभन्दा बढी मूल्य पाउन सक्ने खेलाडीको रुपमा हेरिएको छ । अनुभवी, कप्तानी, ब्याटिङ, बलिङ र फिल्डिङ सबैमा बेन स्टोक्स अब्बल छन् । बेन स्टोक्स टिमलाई जे चाहियो त्यहि गुण भएका खेलाडी हुन् ।

स्टोक्सले आफ्नो न्यूनतम मूल्य अक्सनमा २ करोड भारु राखेका छन् । विश्व क्रिकेटमा लगातार सानदार प्रदर्शन गर्दै आएका स्टोक्स म्याच विनर खेलाडी हुन् । इंग्ल्यान्डलाई २०१९ को एकदिवसीय र २०२२ को टि२० विश्वकप जिताउन बेन स्टोक्स नै नायक बनेका थिए ।

अक्सनमा स्टोक्सको नाम १३ औं नम्बरमा छ । सबै फ्रेन्चाइज उनको प्रतीक्षामा हुनेछन् । बेन स्टोक्सले गतवर्ष बुबाको मृत्युको कारण विश्व क्रिकेटबाटै विश्राम लिएका थिए । त्यसैले मेघा अक्सनमा आफ्नो नाम दिएका थिएनन् । बेन स्टोक्स राजस्थान रोयल्सबाट आइपिएल खेल्दै सानदार प्रदर्शन पनि गर्दै आएका छन् ।

आइपिएलमा ३१ वर्षीय बेन स्टोक्सले ४३ खेलमा २ शतकसहित ९ सय २० रन बनाउनुको साथै २८ विकेट लिएका छन् । केन विलियम्सन र निकोलस पुरनलाई फुकुवा गरेको हैदराबादले स्टोक्सलाई अक्सनमा महँगो मूल्यमा भित्र्याउने अनुमान गरिएको छ ।

अक्सनमा स्टोक्सलाई किन्न हैदराबाद, मुम्बई, पन्जाब र लखनउबीच कडा प्रतिस्पर्धा हुने अनुमान गरिएको छ । हैदराबादलाई कप्तान आवश्यक हुँदा र अक्सनमा अन्य टोली भन्दा बढी मूल्यमा भित्र्याउने सम्भावना छ । स्टोक्स हैदराबाद जाने उच्च सम्भावना छ ।

इंग्ल्यान्डको टेस्ट टोलीको कप्तानी गर्दै उनले खेल्ने शैली नै परिवर्तन गरेका छन् । स्टोक्सलाई किन्न बेंगलोर र कोलकता बाहेक अन्य ८ टोलीबीच कडा प्रतिस्पर्धा हुने अनुमान गरिएको छ । स्टोक्सले अक्सनमा कीर्तिमानी मूल्य पाउन सक्छन् ।

हालसम्म अक्सनमा सर्वाधिक मूल्य राजस्थान रोयल्सले २०२१ मा दक्षिण अफ्रिका क्रिस मोरिसलाई १६ करोड २५ लाख भारुमा किनेको थियो । त्यो रेकर्ड बेन स्टोक्स तोड्न सक्छन् ।