एजेन्सी – इन्डियन प्रिमियर लिग (आइपिएल) को सर्वाधिक सफल फ्रेन्चाइज टोली चेन्नई सुपर किंग्स पाँचौं उपाधि जित्ने धुनमा हुनेछ । चेन्नई २०२३ को मिनी अक्सनमा शुक्रबार केहि सुपर स्टार भित्र्याउन खोज्नेछ ।

चेन्नईको मिनी अक्सनमा आफ्ना पूर्व खेलाडी साम करनलाई भित्र्याउन धनको वर्षा गराउन पछि हट्ने छैन । कप्तान महेन्द्रसिंह धोनी सहित चेन्नई म्यानेजमेन्टको तयारी पनि त्यसै अनुसार हुनेछ । टि२० विश्वकपमा इंग्ल्यान्डलाई जिताउन सानदार प्रदर्शन गरेका साम करनले न्यूनतम २ करोड भारु अक्सनमा राखेका छन् ।

अक्सनमा चेन्नई, मुम्बई र सनराइजर्स हैदराबादबीच साम करनलाई किन्न कडा प्रतिस्पर्धा हुने अनुमान देखिएको छ । जसमा चेन्नईलाई साम करन झनै महत्त्वपूर्ण देखिन्छन् । आफ्ना प्रमुख अलराउन्डर ड्वेन ब्राभोले सन्न्यास लिइसकेका छन् । ब्राभोसँगै अर्का डेथ ओभर स्पेलिष्ट क्रिस जोर्डनलाई पनि फुकुवा गरेको छ । चेन्नई ब्राभोको उत्तराधिकारीको रुपमा साम करनलाई अनुबन्ध गर्न चाहन्छ ।

साम करन २०२० मा ५ करोड ५० लाख भारुमा अनुबन्ध भएका थिए । तर उनी २०२१ मा राजस्थान रोयल्सविरुद्ध घाइते हुन पुगेका थिए । धोनीले केहि खेलमा उनलाई ओपनिङ समेत गराएका थिए । दुई महिना अघि टि२० विश्वकपमा डेथ ओभरमा ६ खेलमा १३ विकेट लिँदै सानदार प्रदर्शन गरेका करन प्रतियोगिता सर्वोत्कृष्ट खेलाडी चुनिएका थिए । बायाँ हाते अलराउन्डर साम करन ओपनिङ देखि तल्लोक्रमसम्म त्यतिनै राम्रो ब्याटिङ पनि गर्ने गर्दछन् ।

ब्राभोले सन्न्यास लिएपछि चेन्नईलाई डेथ ओभर स्पेलिष्ट अलराउन्डर चाहिन्छ । चेन्नईको लागि अक्सनमा साम करन सबैभन्दा उत्तम विकल्प हुन् । चेन्नईसँग अक्सनमा २० करोड ४५ लाख भारु खर्च गर्न पाउने रकम छ । दुई विदेशीसँगै ७ खेलाडीको कोटा बाँकी छ । कडा प्रतिस्पर्धामा पनि चेन्नई साम करनलाई टोलीमा भित्र्याउन सक्छ ।

२४ वर्षीय साम करनले २०१९ मा भने पन्जाब किंग्सबाट दिल्ली क्यापिटल्सविरुद्ध ह्याट्रिक गरेका थिए । ३२ आइपिएल खेल खेलेका साम करनले दुई अर्धशतकसहित ३ सय ३७ रन बनाउनुको साथै ३२ विकेट लिएका छन् ।

इंग्ल्यान्डबाट ३५ टि२० आई खेल्दै ४१ विकेट लिएका छन् । पाकिस्तानलाई फाइनलमा पाँच विकेटले हराउँदै च्याम्पियन बनाउन उनले ४ ओभरमा १२ रन खर्चेर ३ महत्त्वपूर्ण विकेट लिँदै प्लेयर अफ द फाइनल र सर्वोत्कृष्ट खेलाडी दुवै चुनिएका थिए ।

करनले पहिलो खेलमै अफगानिस्तानविरुद्ध ३.४ ओभरमा १० रन खर्चेर ५ विकेट लिएका थिए । उक्त विश्वकपमा पाँच विकेट लिने एक मात्रै खेलाडी समेत बनेका थिए । आयरल्यान्ड र न्युजिल्यान्डसँग समान दुई दुई विकेट लिएका थिए । श्रीलंकासँग एक र भारतविरुद्ध विकेट विहीन बनेका थिए ।

२०१८ देखि उनले इंग्ल्यान्डको टोलीमा सानदार प्रदर्शन पनि गर्दै आएका छन् । चेन्नईसँग तीव्र गतिका बलरमा दीपक चाहर, ड्वेन प्रिटोरियस, मथिसा पाथिराना र मकुेश चौधरी छन् । दीपक र ड्वेन दुबै पावर प्लेमा राम्रो बलिङ गर्ने गर्दछन् । साम करनको आगमनले तीव्र गतिको बलिङ आक्रामण र टोली सन्तुलन दुवै मजबुत हुनेछ ।

इंग्ल्यान्डकै स्टार अलराउन्डर बेन स्टोक्स पनि अक्सनमा हुनेछन् । स्टोक्स सनराइजर्स हैदराबाद जाने उच्च सम्भावना छ । हैदराबादसँग ४२ करोड भारु रकम बाँकी छ । त्यसको फाइदा हैदराबाद उठाउने देखिन्छ । क्यामरन ग्रीन, ड्यानियल साम्स, जेसन होल्डर, जिमी निसम, वेन पार्नेल, दासुन शनका र काइल जेमिसन अलराउन्डर विकल्पमा अक्सनमा हुनेछन् ।