एजेन्सी – अष्ट्रेलिया युवा अलराउन्डर क्यामरन ग्रीन इन्डियन प्रिमियर लिग (आइपिएल) १७ करोड ५० लाख भारु (२७ करोड १८ लाख नेपाली रुपैयाँ) मा मुम्बई इन्डियन्समा पुगेका छन् । ग्रीनले आइपिएल इतिहासमा सर्वाधिक मूल्य पाउने दोस्रो खेलाडी हुन् । केहि मिनेट अघि मात्रै इंग्ल्यान्डका साम करनलाई पन्जाब किंग्सले १८ करोड ५० लाख भारुमा किनेको थियो ।

यसअघि आइपिएलमा सर्वाधिक मूल्य रोयल च्यालेन्जर्स बेंगलोरका विराट कोहली र लखनउ सुपर जायन्ट्सका लोकेश राहुलले १७ करोड भारु रिटेनमा पाएका थिए । कोहलीले २०१८ देखि २१ र राहुलले गतवर्ष देखि पाएका हुन् । अक्सनमा भने २०२१ मा राजस्थान रोयल्सले दक्षिण अफ्रिका क्रिस मोरिसलाई १६ करोड २५ लाख भारु खर्चिएको थियो ।

जुन यसअघि आइपिएल इतिहासकै उच्च मूल्य थियो । ग्रीनलाई किन्न अक्सनमा रोयल च्यालेन्जर्स बेंगलोर र मुम्बई इन्डियन्सबीच कडा प्रतिस्पर्धा भएपछि क्यामरन ग्रीनले १७ करोड ५० लाख भारु पाएका हुन् ।

ग्रीनलाई किन्न बेंगलोरले ६ करोड ७५ लाख भारुपछि छाडेको थियो । बेंगलोरसँग ८ करोड भारुमात्रै छ । त्यसपछि दिल्ली र मुम्बईबीच कडा प्रतिस्पर्धा भयो । पहिलो पटकनै ग्रीनले १७ करोड ५० लाख भारु पाएका हुन् । जुन अप्रत्याशित मूल्य थियो ।

ग्रीन तीव्र गतिको बलिङसँगै विष्फोटक ब्याटिङ गर्ने गर्दछन् । उनले ब्याटिङमा ओपनिङदेखि तल्लोक्रम सम्म खेल्न सक्छन् । गत सेप्टेम्बरमा भारतविरुद्ध ग्रीनले ३० बलमा ८ चौका र ४ छक्कासहित ६१ रनको विष्फोटक इनिङ खेलेपछि अष्ट्रेलियाले २ सय ९ रनको लक्ष्य चार बल अगाडिनै पूरा गरेको थियो ।

त्यसै सिरिजमा भारतविरुद्ध २१ बलमा ७ चौका र ३ छक्कासहित ५२ रनको विष्फोटक इनिङ खेले । त्यसक्रममा उनले १९ बलमै अर्धशतक हानेका थिए । अग्ला कदका ग्रीनले अष्ट्रेलियाको टेस्ट र ओडिआईमा लगातार सानदार प्रदर्शन गर्दै आएका छन् । त्यसैको कारण मुम्बईले महँगो मूल्य खर्चिएको हो ।

करन आइपिएल इतिहासकै महँगा खेलाडी बने