काठमाडौं (हाम्रो खेलकुद) – नेपाल पुलिस क्लबको महिला टोलीले पुष २९ देखि प्रदेश एकमा हुने प्रधानमन्त्री कप महिला टि२० राष्ट्रिय प्रतियोगिता खेल्न नपाउने पक्का भएको छ ।

नवौं राष्ट्रिय खेलकुदबाट घरेलु क्रिकेटमा डेब्यू गर्दै स्वर्ण जितेको पुलिसले खेल्न नपाउने नेपाल क्रिकेट संघ (क्यान) ले जनाएको छ ।

‘पुलिस प्रधानमन्त्री कपमा सहभागी हुँदैन । हाम्रो वर्षभरीको पहिला बजेट बनेको हुन्छ । कुनै टिमलाई सहभागी गराउन हाम्रो तीन महिना अघिनै बोर्ड बैठकबाट निर्णय गराउनु पर्ने हुन्छ । त्यो टोलीको पनि समयमा पत्रचार भएन । पत्रचार भएको भए हामीले बैठकमा लान पनि मिल्थ्यो । बजेट पहिला नै बनाई सकेको हुँदा अप्ठारो पर्न गयो । त्यसैले यो वर्षको लागि सहभागी नहुने भयो’, क्यानका कोषाअध्यक्ष रोशनसिंहले हाम्रो खेलकुदससँग भने ।

खेलाडीलाई खेल्नबाट भने बन्चित नगर्ने जनाएका छन् । त्यसको लागि प्रदेशसँग पनि सहकार्य गर्ने बताए । ‘हामीहरु वहाँहरुलाई खेल्नबाट बञ्चित गर्दैनौं । हामी वहाँहरुलाई खेल्न प्रदेशबाट समन्वय गर्दछौं, रोशनले भने ।

राष्ट्रिय खेलकुद परिषद् (राखेप) ले ४० लाख रुपैयाँ विनियोजन गरेको छ । बाँकी खर्च क्यानले आन्तरिक स्रोतबाट पूरा गर्नेछ । प्रतियोगिता प्रदेश एकको सुनसरीको इटहरी मैदानमा पुस २९ देखि सुरु हुनेछ । पुलिसले नवौं राष्ट्रिय खेलकुदमा नेपाल एपिएफ क्लबलाई फाइनलमा ५ रनले हराउँदै डेब्यू प्रतियोगितामै स्वर्ण जितेको थियो ।

पुलिसको टोलीमा रुविनासँगै काजल श्रेष्ठ, कविता कुँवर, कविता जोशी, अप्सरी बेगम, संगिता राई, सबनम राई र हिरनमयी राय नेपाली टोलीबाट खेलि सकेका छन् । तीव्र गतिका बलर ईश्वरी विष्ट, सम्झ्ना खड्का, रेवती धामी, शोभा रोकाया, मनिषा उपाध्याय र लक्ष्मी साउद छन् ।

८ जना नेपाली टोलीका सदस्य हुँदा बाँकी घरेलु क्रिकेटमा राम्रो गर्दै आएका छन् । प्रदेश एक र सुदूरपश्चिम प्रदेशका खेलाडीको बाहुल्यता छ । बाँकी सात खेलाडी सुदूरपश्चिमबाट छन् । ईश्वरी बिष्ट, शोभा रोकाया, लक्ष्मी साउद, कविता कुँवर, कविता जोशी, सम्झना खड्का र रेवती धामी सुदूरपश्चिमका खेलाडी हुन् । मनिषा उपाध्याय सुदूरकै हुन् । तर उनले यू–१९ र घरेलु क्रिकेट गण्डकीबाट खेल्ने गर्थिन् ।