काठमाडौं (हाम्रो खेलकुद) – नेपाल टि२० लिगमा काठमाडौं नाइट्स र विराटनगर सुपर किंग्सबीचको खेलमा खेलाडीीले टस नै गर्न नमानेपछि दुबै टोली बैठकमा छन् । निर्धारित समय अनुसार टस बिहान ८ः३० मा हुनुपर्ने हो । तर खेलाडीले त्यसअघि टोलीहरुले टसको लागि खेलाडीको प्लेइङ-११ भर्नु पर्ने हुन्छ । तर दुवै टोलीले टसको लागि कागज नै लिन मानेनन् ।

दुवै टोलीका खेलाडी मैदानमा भएपनि टस नै गर्न नमानेका हुन् । टियु एन्डतर्फ अहिले दुबै टिमका खेलाडी, नेपाल टि२० गर्भनिङ काउन्सिलका अध्यक्ष प्रशान्त मल्ल, नेपाल टि२० लिग प्रतियोगिता निर्देशक तथा क्यानका महाप्रबन्धक वृतान्त खनाल, क्यानका क्रिकेट म्यानेजर विनोद दास, कोषाअध्यक्ष रोशनसिंह, म्याचअफिसल लगायतहरुको बैठक भएको छ । लामो समयदेखि बैठक गरि रहेका छन् ।

खेलाडीहरुले पारिश्रमिक नपाएपछि नखेल्ने निर्णय लिएको एक खेलाडीले जानकारी दिए । सम्झौता अनुसार खेल सुरु हुनुअघि ४० प्रतिशत पाउनुपर्ने र प्रतियोगिता चलिरहँदा ६० प्रतिशत पाउने सहमति भएपनि हालसम्म खेलाडीले कुनै रकम पाएका छैनन् । पोखराका खेलाडीले भने दुई किस्तामा ५० प्रतिशत रकम पाइसकेका छन् ।

आयोजक सेभेन थ्रि स्पोर्ट्सका संस्थापक जतिन आहलुवालिया सम्पर्कमा छैनन् । त्यस्तै फार वेस्ट युनाइटेडका मालिक पनि सम्पर्कमा नभएको बुझिएको छ । जनकपुर र विराटनगरका खेलाडीले पनि आफ्नो टिम मालिक सम्पर्कमा नरहेको बताएका छन् ।