एजेन्सी – विकेटकिपर लोकेश राहुलको संयमित अर्धशतकमा भारतले दोस्रो ओडिआई खेलमा श्रीलंकालाई ४ विकेटले हराएको छ । योसँगै घरेलु टोली भारतले श्रीलंकासँग तीन ओडिआई खेलको सिरिज एक खेल अगावै जितेको छ ।

जितको लागि २ सय १६ रनको विजयी लक्ष्य पछ्याएको भारतले ४३.२ ओभरमा ६ विकेट गुमाउँदै पूरा गर्यो । भारतका लोकेश राहुलले १ सय ३ बलमा ६ चौकासहित ६४ रनको संयमित अविजित विजयी इनिङ खेले । हार्दिक पान्ड्या ५३ बलमा ४ चौकासहित ३६, अक्षर पटेल २१ र विराट कोहली ४ रनमा आउट भए ।

पाँचौं विकेटका लागि राहुल र पान्ड्याले ७५ रनको महत्वूर्ण साझेदारी गरे । ओपनर रोहित शर्मा १७, शुभमन गिल २१ र श्रेयस ऐर २८ रनमा आउट भए । श्रीलंका लाहिरु कुमारा र चामिका करुणारत्नेले दुई दुई विकेट लिए । कसुन रजिथा र धनन्जय डि सिल्भाले एक एक विकेट लिए ।

त्यसअघि इडेन गार्डेन कोलकातामा टस जितेर पहिला ब्याटिङ रोजेको श्रीलंका ३९.४ ओभरमा २ सय १५ रनमा अल आउट भयो । डेब्यू खेल खेलेका नुवानिदु फ्रेनान्डोले ६३ बलमा ६ चौकासहित सर्वाधिक ५० रन बनाए ।

कुशल मेन्डिस ३४ बलमा ३ चौका र १ छक्कासहित ३४ रनमा आउट भए । कुशल आउट हुँदा श्रीलंका १७ ओभरमा १०२-२ को मजबुत अवस्थामा थियो । तर त्यसपछि भने लगातार विकेट गुमायो ।

ओपनर अविष्का फ्रेनान्डो २०, धनन्जय डि सिल्भा डक, चरिथ असलंका १५, दासुन शानका २ र वानिन्दु हसरंगा २१ रनमा आउट भए । युवा ब्याटर दुनिथ वेलालेज ३४ बलमा ३ चौका र १ छक्कासहित ३२, चामिका करुणारत्ने र कसुन रजिथालो १७–१७ रन बनाए ।

भारतका कुलदीप यादवले १० ओभरमा ५१ रन खर्चेर ३ विकेट लिए । मोहम्मद शिराजले ५.४ ओभरमा ३० रन खर्चेर ३ विकेट लिए । उमरान मलिकले दुई र अक्षर पटेलले एक विकेट लिए । भारत पहिलो खेलमा ६७ रनले विजयी भएको थियो । तेस्रो खेल आइतबार हुनेछ ।