काठमाडौं (हाम्रो खेलकुद) – तीव्र गतिकी बलर सबनम राईको घातक बलिङमा प्रदेश एकले प्रधानमन्त्री कप महिला राष्ट्रिय टि२० प्रतियोगितामा मधेश प्रदेशलाई ९ विकेटले हराउँदै विजयी सुरुवात गरेको छ ।

जितको लागि ५० रनको सामान्य विजयी लक्ष्य पछ्याएको प्रदेश एकले ११.४ ओभरमा १ विकेट गुमाउँदै पूरा गर्यो । प्रदेश एककी कप्तान रुविना क्षेत्री बेलबासे २७ बलमा २ चौकासहित २० रनमा अविजित रहिन् । अर्की ओपनर काजल श्रेष्ठ ४२ बलमा ४ चौकासहित २४ रनमा आउट भइन् । काजल रन आउट भएकी थिइन् ।

त्यसअघि जनता क्रिकेट पार्क इटहरीमा टस जितेर पहिला ब्याटिङ रोजेको मधेश १९.२ ओभरमा ४९ रनमा अल आउट भयो । मधेशकी सरस्वती कुमारी चौधरीले २८ बलमा २ चौकासहित सर्वाधिक १२ रन बनाइन् । खराब ब्याटिङ गर्नेक्रममा मधेशका १० खेलाडीले खाता खोल्न सकेनन् । जसमध्य चार खेलाडीले खाता खोल्न सकेनन् ।

प्रदेश एककी सबनम राईले ४ ओभरमा ३ मेडनसहित १ रन खर्चेर ४ विकेट लिइन् । निशा शाहले ४ ओभरमा १ मेडनसहित ३ रन खर्चेर २ विकेट लिइन् । रुविना क्षेत्रीले दुई, एलिसा खडिया र ज्योति दनवारले एक एक विकेट लिए ।

७ प्रदेश र नेपाल एपिएफ क्लब गरि कुल ८ टोली प्रतियोगितामा सहभागी छन् । जसमा दुई समूहमा विभाजन गरिएको छ । समूह ए मा नेपाल एपिएफ क्लब, सुदूरपश्चिम प्रदेश, बागमती प्रदेश र गण्डकी प्रदेश छन् । समूह बी मा प्रदेश एक, मधेश प्रदेश, लुम्बिनी प्रदेश र कर्णाली प्रदेश छन् । समूहका शीर्ष दुई टोली सेमिफाइनल खेल्नेछन् । सेमिफाइनल माघ ६ र फाइनल माघ ७ मा हुनेछ ।