काठमाडौं (हाम्रो खेलकुद) – मधेश प्रदेशले प्रधानमन्त्री कप महिला टि२० राष्ट्रिय प्रतियोगितामा लुम्बिनी प्रदेशलाई १६ रनले हराउँदै सेमिफाइनलमा स्थान बनाएको छ । योसँगै सेमिफाइनल समिकरण पूरा भएको छ ।

जितको लागि १ सय ८ रनको विजयी लक्ष्य पछ्याएको लुम्बिनीले निर्धाारित २० ओभरमा ५ विकेट गुमाउँदै ९१ रन बनायो । लुम्बिनीको लागि मधु डिसीले १७ बलमा ३ चौकासहित सर्वाधिक २१ रनमा अविजित रहिन् । त्यस्तै रञ्जु श्रेष्ठ २८ बलमा २ चौकासहित २१ रनमा अविजित रहिन् । छैटौं विकेटका लागि रञ्जु र मधुले ३५ रनको साझेदारी गरेका थिए ।

प्रमुख ब्याटर तथा ओपनर लक्ष्मी चौधरी १७ बलमा १ चौकासहित सर्वाधिक १२ रनमा आउट भइन् । आश्मा पुलामी मगर र कप्तान सरस्वती घर्तीमगर ११–११ रनमा आउट भए । सरस्वती पुन १० रनमा आउट भइन् । मधेशकी भूमि सिंहले ४ ओभरमा ११ रन खर्चेर २ विकेट लिइन् । कविता गौतमले एक विकेट लिइन् ।

त्यसअघि इटहरीको जनता पार्कमा टस हारेर पहिला ब्याटिङ थालेको मधेशले २० ओभरमा ५ विकेट गुमाउँदै १ सय ७ रन बनायो । मधेशको लागि साना प्रविनले ६४ बलमा ५ चौकासहित सर्वाधिक ४६ रन बनाइन् । रोजी कडारीले १५ रन बनाइन् । अन्य ब्याटरले दोहोरो अंकमा रन बनाउन सकेनन् । लुम्बिनीले २७ रन अतिरिक्त खर्चिएको थियो ।

लुम्बिनीको लागि मनिषा राना, सरस्वती पुन र विभस्ना बिसीले एक एक विकेट लिए । समूह ए बाट सुदूर ३ खेलमा ६ अंकका साथ शीर्ष स्थानमा रह्यो । एपिएफ ३ खेलमा २ मा जित र १ मा हारसहित दोस्रो स्थानमा रह्यो । समूह बी मा प्रदेश एक ३ खेलमा ६ अंकका साथ शीर्ष स्थानमा रह्यो । मधेश ३ खेलमा २ मा जित र एक मा हासहित दोस्रो स्थानमा रह्यो ।

पहिलो सेमिफाइनल खेलमा सुदूर र मधेशबीच प्रतिस्पर्धा हुनेछ । दोस्रो सेमिफाइनल खेल प्रदेश एक र एपिएफबीच प्रतिस्पर्धा हुनेछ । सेमिफाइनल शुक्रबार र फाइनल शनिबार हुनेछ ।