काठमाडौं (हाम्रो खेलकुद) – नेपाली महिला क्रिकेट टोलीकी कप्तान रुविना क्षेत्री बेलबासेले हङकङमा हुने दोस्रो संस्करणको फेयर ब्रेक इन्भिटेसनल टि२० प्रतियोगिता खेल्ने भएकी छिन् । रुविनालाई द बर्मी आर्मीले रिटेन गरेको छ । गतवर्ष रुविनाले द बर्मी आर्मीबाट नै खेलेकी थिइन् ।

द बर्मी आर्मीले २०२३ को टोली घोषणा गर्दा रुविनालाई पनि टोलीमा राखेको छ । रुविनाले दुई खेल मात्रै खेल्ने अवसर पाएकी थिइन् । उनले ब्याटिङमा कुनैपनि मौका नपाउँदा बलिङमा एक इनिङमा २ ओभर बलिङ गर्दै २० रन खर्चेकी थिईन् ।

अर्की अनुभवी खेलाडी सीता रानामगरलाई भने तीन महिना अघिनै टोर्नाडोस वुमेन्सले रिटेन गरेको थियो । सीता सम्मिलित टोर्नाडोसले गत वर्ष दुबईमा भएको फाइनलमा फाल्कोन्स वुमन्सलाई ८ विकेटले हराउँदै टोर्नाडोस च्याम्पियन बनेको हो ।

त्यस प्रतियोगितामा सीताले ७ खेलमा ४ विकेट लिँदा २२ रन बनाएकी थिइन् । त्यस समय सीताले गरेको ‘पुष्पा’ सेलेब्रेसनले पनि निकै चर्चा पाएको थियो । प्रतियोगिता आगमी अप्रिल ३ देखि १६ अप्रिल सम्म हुनेछ ।

रुविना र सीता नेपाली महिला क्रिकेटका दुई सर्वाधिक सफल खेलाडी हुन् । रुविनाले घरेलु क्रिकेट प्रदेश एक र सीताले नेपाल एपिएफ क्लबको कप्तानी गर्दै आएकी छिन् । घरेलु क्रिकेटमा शीर्षक्रममा ब्याटिङ गर्ने यी दुबै ब्याटर स्पिन बलिङ गर्ने गर्दछन् । त्यस्तै नेपाली टोलीमा भने सीताले ओपनिङ र रुविनाले मध्यक्रममा खेल्ने गर्दछिन् ।