काठमाडौं (हाम्रो खेलकुद) – नेपाल टि२० लिगमा स्पोट फिक्सिङको आरोपमा पक्राउ परेका युवा अलराउन्डर मोहम्मद आदिल आलम र पूर्व खेलाडी महबुब आलमलाई काठमाडौं ल्याउने तयारी गरिएको छ । नेपाल प्रहरीको केन्द्रिय अनुसन्धान ब्यूरो (सिआईबी) ले सोमबार बिहान आदिल र महबुबलाई पक्राउ गरेको थियो ।

मेहबुब मोरङ र आदिललाई सप्तरी प्रहरीले प्रकाउ गरेको हो । यी दुबै क्रिकेटरलाई हिरासतमा राखिएको छ । स्रोतका अनुसार सिआईबीको आग्रहमा काठमाडौं पठाउन लागिएको बुझिएको छ । आदिल अन्सारीले नेपाल टि२० लिगमा जनकपुर रोयल्सबाट खेलेका थिए । खेलको दौरानमा आदिलले फ्ँयालेको एक नो बल चर्चामा रहँदै आएको थियो ।

आदिलले फार वेस्ट युनाइटेडविरुद्ध छैटौं ओभरको फ्याँलेको नो बलले उनीमाथि शंका बढ्दै गएको थियो । एन्टी करप्सन युनिट (एसियु) ले उनीसँग त्यसपछि सोधपुछ गरेको थियो । शंका बढ्दै गएपछि आदिलले बाँकी खेल भने खेलेका थिएनन् । आदिलले नेपाल टि२० लिगमा जनकपुरबाट ८ खेल खेलेका थिए ।

महबुब आलम भने स्पोट फिक्सिङको लागि बाहिरबाट भूमि खेलेको बताइदै आएको थियो । उनी कुनैपनि टोलीमा आबद्ध भने थिएनन् । गत पुष १९ मा नेपाल टि२० लिगमा खेल मिलेमतो (म्याच फिक्सिङ) र स्पोट फिक्सिङ बारे प्रश्न उठेपछि गृह मन्त्रालयले नेपाल प्रहरीको केन्द्रीय अनुसन्धान ब्युरो (सिआइबी) लाई छानविनका लागि निर्देशन दिएको थियो । सिआईबीले केहि क्रिकेटर र क्यानका पदाधिकारीसँग बयान समेत लिएको थियो । स्रोतका अनुसार केहि थप नेपाली क्रिकेटर पनि प्रकाउ पर्ने सम्भावना छ ।

अधिकारिक प्रसारणमा कमेन्टेटरको रुपमा काम गर्दै आएका सचिन तिमल्सिनाले लिगमा मिलेमतो भइरहेको बताएका थिए । काठमाडौं नाइट्सका कप्तान ज्ञानेन्द्र मल्लले पनि आफ्ना एक खेलाडीलाई फिक्सिङको लागि प्रस्ताव आएको बताएका थिए ।

आदिलले नेपालबाट ६ ओडिआई र ८ टि२० आई खेल खेलेका छन् । आदिलले मधेश क्रिकेटबाट घरेलु क्रिकेट खेल्ने गर्दछन् । आदिल तल्लोक्रममा आक्रामक ब्याटिङसँगै तीव्र गतिमा बलिङ गर्ने गर्दछन् । आदिललाई नेपाली क्रिकेट टोलीका भविष्यको रुपमा हेरिदै आएको थियो ।

महबुबले २००८ मा मोजाम्बिकविरुद्ध ७.५ ओभरमा १ मेडन सहित १२ रन खर्चेर १० विकेट लिदै गिनिज बुकमा नेपाल लेखाएका थिए । उनी सिमित ओभरको अन्तर्राष्ट्रिय खेलमा १० विकेट लिने विश्वको एक्लो खेलाडी हुन् ।

कीर्तिपुरस्थित त्रिवि मैदानमा नेपाल टि २० लिग पुष ९ गतेदेखि २७ गतेसम्म सञ्चालन भएको थियो । पहिलो पटक आफैले आयोजना गरेको नेपाल टि २० लिगका लागि क्यानले सेभन थ्री स्पोर्टससँग कर्मसियल एन्ड स्ट्र्याटिजिक पार्टरका रुपमा सम्झौता गरेको थियो । तर सेभेन थ्रिका संस्थापक जतिन र सिइओ अभिषेक नेपाल टि२० लिगको बीचमै भारत गएका थिए ।