एजेन्सी – भारतीय क्रिकेट बोर्ड (बिसिसिआई) ले पहिलो पटक आयोजना गर्न लागेको वुमन्स प्रिमियर लिग (डब्लुपिएल) को अक्सनमा नेपालका पाँच खेलाडीले नाम दर्ता गराएका छन् ।

अर्को साता फेब्रुअरी १३ मा हुने अक्सनमा नेपालबाट पाँच खेलाडीको नाम दर्ता भएको हो । नेपालबाट कप्तान रुविना क्षेत्री बेलबासे, अलराउन्डर सीता रानामगर, तीव्र गतिकी बलर कविता कुँवर, अश्मिना कर्माचार्य र ब्याटर इन्दु बर्माको नाम अक्सनमा समावेश हुनेछ ।

डब्लूपिएललमा हरेक टोलीले बढीमा १८ खेलाडी किन्न पाउनेछन् । एक टोलीमा ७ विदेशी खेलाडी रहन पाउँछन् । जसमा कम्तिमा एक एसोसिएट खेलाडी हुनुपर्ने हुन्छ । प्लेइङ ११ मा पाँच विदेशी खेलाडी खेलाउन पाउँदा एक एसोसियट हुनुपर्ने हुन्छ । जस कारण नेपाली खेलाडी अक्सनमार्फत अनुबन्धित हुने सम्भावना उच्च छ । १ हजार ५ सय खेलाडीले अक्सनमा नाम दर्ता गराएको बिसिसिआइले जनाएको छ ।

पाँच फ्रेन्चाइज टोली सहभागी प्रतियोगिता आगमी मार्च ४ देखि २६ सम्म हुने बताइएको छ । प्रतियोगितामा कुल २२ खेल हुनेछन् । इन्डियन प्रिमियर लिग (आइपिएल)मा खेलाडीहरु एजेन्टमार्फत आफ्नो नाम दर्ता गराउन सक्छन् । तर डब्लूआइपिएलमा क्रिकेट संघमार्फत नै दर्ता गराउनु पर्ने नियम छ । नेपालबाट अक्सनमा नाम दिने पाँच खेलाडीको जानकारी :

५. रुविना क्षेत्री (अलराउन्डर)

नेपाली क्रिकेट टोलीकी कप्तान रुविना क्षेत्री बेलबासेले घरेलु र राष्ट्रिय दुबै प्रतियोगितामा लगातार राम्रो प्रदर्शन गर्दै आएका छन् । एक दशक भन्दा लामो समयदेखि नेपालबाट खेल्दै आएकी रुविना शीर्ष र मध्यक्रम दुबैमा ब्याटिङ गर्ने गर्दछिन् । पहिला मध्यगतिमा बलिङ गर्ने उनले पछिल्लो समय स्पिन गर्ने गर्दछिन् ।

रुविनाले ३२ डब्लटि२० आईमा ३ सय ५९ रन बनाउनुको साथै २३ विकेट लिएकी छिन् । रुविना नेपालबाट अन्तर्राष्ट्रिय महिला क्रिकेटमा ह्याट्रिक लिने पहिलो खेलाडी हुन् । रुविनाले २००९ मा सिंगापुरविरुद्ध पाँच बलमा पाँच विकेट लिँदै विश्व कीर्तिमाान कामय गरेकी थिइन् । २०१९ मा डब्लटि२० आईमा कुवेतविरुद्ध ह्याट्रिक लिएकी थिइन् । विदेशी लिगको रुपमा रुविनाले गतवर्ष फेयर ब्रेक टि२० प्रतियोगिा ब्यार्मी आर्मीबाट खेलेकी थिइन् ।

४.सीता रानामगर (अलराउन्डर)

बायाँ हाते अलराउन्डर सीता रानमगर नेपाली क्रिकेट टोलीकी एक सर्वाधिक सफल क्रिकेटर हुन् । सीता नेपालबाट अन्तर्राष्ट्रय कुनैपनि क्रिकेट प्रतियोगितामा एकै इनिङमा सर्वाधिक रन बनाउने ब्याटर हुन् ।

सीताले ओपनिङ ब्याटिङसँगै स्पिन बलिङ गर्ने गर्दछिन् । सीताले ३० डब्लटि२० आई खेलमा ५ सय ७ रन बनाउनुको साथै ३१ विकेट लिएकी छिन् । उनी नेपालबाट डब्ल टि२० आईमा सर्वाधिक रन बनाउने र विकेट लिने बलर समेत हुन् । सीताले २०२१ नोभेम्बरमा कतारविरुद्ध तेस्रो खेलमा ८२ रनको इनिङ खेलेकी थिइन् ।

जुन नेपालबाट महिला क्रिकेटरले बनाएको उच्च स्कोर हो । सीताले गतवर्ष फेयर ब्रेकमा टोर्नाडोस वुमेन्सबाट राम्रो प्रदर्शन गर्दै प्रतियोगिता ड्रिम टिममा परेकी थिइन् ।

३. इन्दु बर्मा (ब्याटर)

नेपाली महिला क्रिकेट टोलीकी उपकप्तान इन्दु बर्माले शीर्षक्रममा ब्याटिङ गर्छिन् । इन्दु नेपालबाट डब्लटि२० आईमा अर्धशतक प्रहार गर्ने पहिलो खेलाडी हुन् ।

इन्दुले ३० डब्लटि२० आई खेलमा ३ सय ३९ रन बनाएकी छिन् । उनले कतारविरुद्ध २०२१ नोभेम्बरमा ५५ रनको इनिङ खेलेकी थिइन् । शीर्षक्रमकी भरपर्दी ब्याटर इन्दु मध्य गतिमा बलिङ पनि गर्ने गर्दछिन् ।

२. अश्मिना कर्माचार्य- बलर

तीव्र गतिकी बलर अश्मिना कर्माचार्य नेपाली महिला क्रिकेटको भविष्यको रुपमा हेरिएको छ । उनी तीव्र गतिको बलिङको लागि चर्चित छिन् । बागमती प्रदेशकी कप्तान समेत रहेकी अश्मिनाले गत वर्षदेखि नेपाली महिला टोलीबाट खेल्दै आएकी छिन् । २२ वर्षीय अश्मिनाले ७ डब्लूटि२० आईमा १० विकेट लिएकी थिइन् ।

गत जुनमा एसिसी टि२० वुमन्स च्याम्पियनसिपको पहिलो सेमिफाइनलमा अश्मिना कर्माचार्यले ३.५ ओभरमा १० रन खर्चेर ५ विकेट लिँदै युएईलाई ८१ रनमा अल आउट गरेपनि वर्षाको कारण खेल रद्ध हुन पुगेको थियो ।

तल्लोक्रममा अश्मिनाले राम्रो ब्याटिङको क्षमता राख्छिन् । तीव्र गतिको बलिङ उनको प्रमुख खुबी हो । युवा खेलाडीसँगै गति हुँदा उनको सम्भावना बलियो छ ।

१.कविता कुँवर (अलराउन्डर)

तीव्र गतिकी बलिङ अलराउन्डर कविता कुँवर नेपाली महिला क्रिकेटकी भविष्य हुन् । कविता तीव्रगतिसँगै राम्रो ब्याटिङ गर्ने गर्दछन् । उनको गतिको चाल पाउन विपक्षी ब्याटरलाई सहज हुँदैन । कविता ओपनिङ देखि तल्लोक्रमसम्म राम्रो ब्याटिङ पनि गर्ने गर्दछन् ।

कविताले २९ डब्लूटि२० आई खेलमा २६ विकेट लिनुको साथै ३१ विकेट लिएकी थिइन् । अघिल्लो महिना प्रधानमन्त्री कपको उपाधि जिताउन सर्वोत्कृष्ट खेलाडी र ब्याटर चुनिएकी कविताले दुई अर्धशतकसहित १ सय ३४ रन बनाएकी थिइन् । कविताले २०१९ मा गण्डकी प्रदेशविरुद्ध उत्कृष्ट शतक हानेकी थिइन् । कविताको पनि अक्सनमा बिक्ने राम्रो सम्भावना छ ।