एजेन्सी – भारतीय लोेकप्रिय घरेलु क्रिकेट प्रतियोगिता रणजी ट्रफीको सेमिफाइनल खेलको पहिलो दिन मयंक अग्रवालसहित तीन ब्याटरले शतक हानेका छन् ।
पहिलो सेमिफाइनल खेलमा बंगालले मध्य प्रदेशविरुद्ध टस जितेर पहिला ब्याटिङ रोज्दै पहिलो दिन ४ विकेट गुमाउँदै ३ सय ७ रन बनाएको छ । बंगालका अनुस्तुप मजुमदारले २ सय ६ बलमा १३ चौका र १ छक्कासहित १ सय २० रन जोड्दै आउट भए ।
सुदीप कुमार घरामी २ सय १३ बलमा १२ चौका र २ छक्कासहित १ सय १२ रनमा आउट भए । सुदीप र अनुस्तुपले तेस्रो विकेटका लागि २ सय ४१ रनको साझेदारी गरेका थिए । मध्यप्रदेशका अनुभव अग्रवालले सर्वाधिक दुई विकेट लिएका छन् ।
त्यस्तै दोस्रो सेमिफाइनल खेलमा कर्नाटकाले सौराष्ट्रविरुद्ध टस हारेर पहिला ब्याटिङ गर्दै ५ विकेटको क्षतिमा २ सय २९ रन बनाएको छ । भारतीय क्रिकेट टोलीका ओपनर समेत रहेका कप्तान मयंक अग्रवालले २ सय ४६ बलमा ११ चौका र १ छक्कासहित १ सय १० रनको अविजित इनिङ खेलेका छन् ।
दोस्रो दिन कर्नाटका अग्रवालबाट ठूलो इनिङ चाहन्छ । रणजी ट्रफीको फाइनल १६ फेब्रुअरी देखि सुरु हुनेछ ।
