एजेन्सी – भारतले दुई दोहोरो शतकधारी ब्याटर ईशान किशन र शुभमन गिललाई अष्ट्रेलियासँगको पहिलो टेस्ट खेलमा बेन्चमा राखेको छ । नागपुरमा भएको टसमा अष्ट्रेलिया कप्तान प्याट कमिन्सले टस जितेर पहिला ब्याटिङको निर्णय लिएका छन् ।

भारतले ओडिआई क्रिकेटमा दोहोरो शतक प्रहार गर्ने दुवै युवा ब्याटरलाई अष्ट्रेलियाविरुद्ध बेन्चमा राखेको छ । गिलले तीन साताअघि न्युजिल्यान्डविरुद्ध पहिलो ओडिआई खेलमा १ सय ४९ बलमा १९ चौका र ९ छक्कासहित २ सय ८ रनको दोहोरो शतक प्रहार गरेका थिए ।

न्युजिल्यान्डविरुद्ध अघिल्लो हप्ता तेस्रो टि२० आई खेलमा गिलले १ सय २६ रनको शतकीय इनिङ खेलेका थिए । गिल भारतीय टि२० आईमा ओडिआई र टि२० आई दुबैमा सबैभन्दा कम उमेरमा दोहोरो र शतक प्रहार गर्ने खेलाडी हुन् । टि२० आईमा भारतबाट एकै इनिङमा खेलेको उत्कृष्ट प्रदर्शन समेत हो ।

भारतले ओपनरको रुपमा कप्तान रोहित शर्मा र लोकेश राहुललाई मैदान उतार्ने भएको छ । राहुललाई खेलाउने भएपछि गिल बेन्चमा छन् । त्यस्तै विकेटकिपर ईशान किशन पनि बेन्चमा छन् । ईशान किशनले गत डिसेम्बरमा बंगलादेशविरुद्ध तेस्रो ओडिआई खेलमा २ सय १० रनको दोहोरो शतकीय इनिङ खेलेका थिए ।

भारतले विकेटकिपरको रुपमा स्रिकर भरतलाई डेब्यू दिँदा किशनलाई बेन्चमा राखेको छ । भरतले भारत ए बाट लगातार उत्कृष्ट प्रदर्शन गर्दै आएका छन् । चार टेस्ट खेलको सिरिजमा भारतलाई तीन खेल जित्नुपर्ने दबाब छ । आइसिसी विश्व टेस्ट च्याम्पियनसिप २०२३ को फाइनल खेल्न भारतले चार मध्य तीन खेल जित्नुपर्ने हुन्छ ।

अन्यथा फाइनल दौडबाट बाहिरिनेछ । भारत बाहिरिदा दक्षिण अफ्रिका र श्रीलंका मध्य एक टोली फाइनलमा पुग्नेछन् । अष्ट्रेलियाको फाइनल यात्रा भने अनौपचरिक रुपमा पक्का भईसकेको छ । भारतले आजको खेलमा तीन स्पिनर मैदान उतारेको छ । रविन्द्र जडेजा चोटपछि टोलीमा फर्किएका छन् । जडेजा, रविचन्द्रन आश्विन र अक्षर पटेल प्लेइङ ११ मा छन् ।

भारतको प्लेइङ ११ :

रोहित शर्मा (कप्तान), लोकेश राहुल, चेतेश्वर पुजारा, विराट कोहली, सूर्यकुमार यादव, स्रिकर भरत (विकेटकिपर), रविन्द्र जडेजा, रविचन्द्रन आश्विन, अक्षर पटेल, मोहम्मद शामी र मोहम्मद शिराज ।