काठमाडौं (हाम्रो खेलकुद) – युवा स्पिनर सूर्य तामाङ पहिलो पटक नेपाली क्रिकेट टोलीमा परेका छन् । नेपालले मंगलबारदेखि टियु क्रिकेट मैदानमा हुने आइसिसी विश्वकप लिग–२ त्रिकोणात्मक ओडिआई सिरिजको लागि नामिबिया र स्कटल्यान्डसँग खेल्ने १४ सदस्य टोली घोषणा गरेको छ ।

घोषणा टोलीमा बायाँ हाते स्पिनर सूर्य पहिलो पटक परेका छन् । सूर्य पहिलो पटकनै बन्द प्रशिक्षणमा परेका थिए । नेपालले तीन स्पिनरमा सूर्य, सन्दीप लामिछाने र ललितनारायण राजवंशीलाई टोलीमा राखेको छ ।

२१ वर्षीय सूर्यले दुई साताअघि नेपाल टि२० लिगमा सानदार प्रदर्शन गरेका थिए । विराटनगर सुपर किंग्सलाई फाइनलसम्म पुर्याउन सूर्यले उत्कृष्ट प्रदर्शन गर्दै उदीयमान खेलाडी चुनिएका थिए । सूर्यले ८ खेलमा ४.३५ को इकोनीमा रन खर्चिदै १२ विकेट लिएका थिए ।

सूर्यले घरेलु क्रिकेट भने बागमती प्रदेशबाट खेल्ने गर्दछन् । नेपाली यू–१९ टोलीबाट खेलिसकेका सूर्यले प्रधानमन्त्री कपमा ५ विकेट लिएका थिए । त्यसअघिको प्रधानमन्त्री कपमा भने सूर्य नेपाल एपिएफ क्लबमा थिए । २०२० एपिएफ गएपनि त्यहाँ मौका नपाएपछि उनी पुनः बागमती फर्किएका थिए ।

स्पिनर सन्दीप लामिछाने बलात्कारको आरोप लागेपछि पहिलो पटक टोलीमा फर्किएका छन् । सन्दीपले प्लेइङ ११ मा खेल्ने पक्का हुँदा ललित र सूर्यमध्य एकले मौका पाउनेछन् ।

नेपालले घरेलु मैदान टियुमा पहिलो खेल फागुन २ (फेब्रुअरी १४) मा नामिबियासँग खेल्नेछ । दोस्रो खेल फागुन ५ (फेब्रुअरी १७) मा स्कटल्यान्डसँग खेल्नेछ । नेपालले फागुन ६ (फेब्रुअरी १८) मा नामिबियासँग खेल्नेछ । नेपालले यस सिरिजको अन्तिम खेल फागुन ९(फेब्रअरी २१) मा स्कटल्यान्डसँग खेल्नेछ ।

नेपालको टोली :

रोहित पौडेल (कप्तान), कुशल भुर्तेल, आसिफ शेख, ज्ञानेन्द्र मल्ल, कुशल मल्ल, दीपेन्द्रसिंह ऐरी, सन्दीप जोरा, सोमपाल कामी, करण केसी, ललितनारायण राजवंशी, सन्दीप लामिछाने, गुलशन झा, भीम सार्की र सूर्य तामाङ ।

वैकल्पिक खेलाडी :

आरिफ शेख, प्रतिश जि.सी. मौसम ढकाल र अर्जुन साउद ।