काठमाडौं (हाम्रो खेलकुद) – युवा ब्याटर कुशल मल्ल आइसिसी विश्वकप लिग २ त्रिकोणात्मक ओडिआई सिरिजमा स्कटल्यान्डविरुद्ध शतक नजिक पुगेर आउट भएका छन् । टियु क्रिकेट मैदानमा २ सय ७५ रनको विजयी लक्ष्य पछ्याएको नेपालले २८ ओभरमा ६ विकेट गुमाउँदै १ सय ७९ रन बनाएको छ ।

कुशल मल्ल ६७ बलमा ९ चौका र ४ छक्कासहित ८१ रनमा आउट भएका छन् । कुशल मल्ल स्पिनर मार्क वाटको बलमा ठूलो सट खेल्ने धुनमा टप एज लागेर हम्जा ताहिरबाट क्याच आउट भएपछि शतक बनाउन चुकेका थिए ।

उनको यो अन्तर्राष्ट्रिय कुनैपनि खेलको उत्कृष्ट प्रदर्शन हो । एक समय ७७–५ को अवस्थमा पुगेको नेपाललाई छैटौं विकेटका लागि कुशल र दीपेन्द्रसँग ऐरीले शतकीय साझेदारी गरेका थिए । यो छैटौं विकेटका लागि दोस्रो उच्च साझेदारी हो । ओडिआईमा छैटौं विकेटका लागि उच्च साझेदारी १ सय ६ रन छ । गत जुनमा छैटौं विकेटका लागि आरिफ शेख र सोमपाल कामीले अमेरिकाविरुद्ध १ सय ६ रनको शतकीय साझेदारी गरेका थिए ।

कुशल मल्लले ब्यक्तिगत ६ रनमा जीवनदान पाएका थिए । तीव्र गतिका बलर ब्रेन्डन म्याकुमेलनको बलमा आठौं ओभरको चौथो बलमा कुशल मल्ल कट एण्ड बोल्ड आउट हुनबाट बचेका थिए । कुशल मल्लले ४२ बलमा आफ्नो ओडिआई करिअरको दोस्रो अर्धशतक पूरा गरेका हुन् । २०२० मा कुशलले यसअघि डेब्यू खेलमा अमेरिकाविरुद्ध टियु क्रिकेट मैदानमै ५० रन बनाएका थिए । कुशलको यो पूनरागमन सिरिज समेत हो ।

तीव्र गतिका बलर क्रिस सोलको तेस्रो ओभरको पहिलो बलमा कुशल भुर्तेल एज लागेर विकेटकिपर म्याथ्यु क्रसबाट १६ रनमा क्याच आउट भएका थिए । कुशल भुर्तेलले ८ बलमा ४ चौका हानेका थिए । ज्ञानेन्द्र मल्लले चौका हान्दै सुरुवात गरेका थिए । चौथो बलमा ज्ञानेन्द्र एज लागेर क्रसबाटै क्याच आउट भए ।

त्यसअघि इनिङको पहिलो ओभरमै सोलले २३ रन खर्चेका थिए । तेस्रो ओभरमा भने उनले खेल मोडेका थिए । पाँचौं ओभरमा आसिफ शेखलाई उनले ९ रनमा क्याच आउट गराए ।

कप्तान रोहित पौडेल ६ रनमा क्याच आउट भए । स्पिनर मार्क वाटको बलमा कट खेल्नेक्रममा रोहित प्वाइन्टमा ज्याक जार्विसबाट क्याच आउट हुन पुगेका थिए । सन्दीप जोरा ५ रनमा मार्क वाटको बलमा एलबीडब्लू आउट हुँदा नेपाल १०.५ ओभरमा ७७–५ को अवस्थामा पुगेको थियो ।