काठमाडौं (हाम्रो खेलकुद) – ओपनर सार्थक धितालको अर्धशतकमा पाँचपोखरी क्रिकेट क्लबले पाचौँ संस्करणको पाँचपोखरी टी–२० जिल्लास्तरीय क्रिकेट प्रतियोगिता दोस्रो सेमिफाइनल खेलमा भोताङ क्रिकेट क्लबलाई ५ विकेटले हराउँदै फाइनलमा स्थान बनाएको छ ।

त्यस्तै अर्को सेमिफाइनल खेलमा विवेक तामाङको उत्कृष्ट प्रदर्शनमा ह्योल्मो ११ ले चौतारा साँगाचोकगढी नगरपालिकालाई ५८ रनले हराउँदै फाइनलमा स्थान बनायो । उपाधिको लागि ह्योल्मो ११ र पाँचपोखरी क्रिकेट क्लबबीच प्रतिस्पर्धा हुने भएको छ । काठमाडौंको तल्लोमुलपानी क्रिकेट मैदानमा संचालित प्रतियोगिता पहिलो सेमिफाइनलमा ह्याल्मोले चौतारामाथि सहज जित हातपार्यो ।

मुलपानी क्रिकेट मैदानमा टस जितेर पहिला ब्याटिङ राजेको ह्याल्मो २० ओभरमा २ विकेट गुमाउँदै ७२ रन बनायो । विवेकले ६२ बलमा ८ चौका र ३ छक्कासहित ८४ रनको इनिङ खेले । त्यस्तै विनोद तामाङले ५७ बलमा ६ चौकासहित ७४ रन बनाए । जितको लागि १ सय ७३ रनको विजय लक्ष्य पछ्याएको चौताराले २० ओभरमा ९ विकेट गुमाउँदै १ सय १४ रन बनायो । यसका लागि विकाश कार्की २२ रन बनाए ।

दोस्रो सेमिफाइनल खेलमा टस हारेर पहिले ब्याटिङ गरेको भोताङ क्रिकेट क्लबले निर्धारित २० ओभरमा ९ विकेट गुमाउँदै १ सय १९ रन मात्रै बनाउन सकेको थियो । उसका पेम्बा तामाङले ३४ बलमा ४ चौका र १ छक्कासहित सर्वाधिक ३८ रन बनाए । पासाङ दोर्जे तामाङले २७ रनको योगदान दिए । पाँचपोखरीका मनोजले सर्वाधिक तीन, सार्थक र अर्यान धितालले दुई विकेट लिए ।

जितको लागि १ सय २० रनको विजयी लक्ष्य पछ्याएको पाँचपोखरीले १९.३ ओभरमा ५ विकेट गुमाउँदै पूरा गर्यो । सार्थकले ५१ बलमा ६ चौका र १ छक्कासहित ५७ रनको अविजित इनिङ खेले ।

पाँचपोखरी थाङ्पाल गाउँपालिका खेलकुद विकास समितिको आयोजना तथा पाँचपोखरी क्रिकेट क्लबको व्यवस्थापनमा शनिबारबाट सुरु भएको प्रतियोगिता चैत ३ गतेसम्म चल्नेछ । प्रतियोगितामा सिन्धुपाल्चोक जिल्लाका ७ टिमको सहभागिता छ । प्रतियोगिताको मुख्य प्रायोजक माउन्ट शेर्पा ट्राभल एंड टुरिजम रहेको छ।

प्रतियोगिताको विजेताले ८० हजार र उपविजेताले ५० हजार रुपैयाँ प्राप्त गर्नेछन् । प्रतियोगिताको सर्वोत्कृष्ट खेलाडी, उत्कृष्ट ब्याटर, उत्कृष्ट बलर र उत्कृष्ट अलराउण्डरलाई ट्रफी तथा प्रमाणपत्र प्रदान गरिनेछ ।

साथै ग्रेट हिमालयन क्रिकेट एकेडेमी (जीएचसीए) ले यस प्रतियोगितामा सफलता हासिल गर्ने सर्वोत्कृष्ट खेलाडीलाई एकवर्ष र उत्कृष्ट बलर एवं उत्कृष्ट ब्याटरलाई ६ महिना निःशुल्क क्रिकेट प्रशिक्षण प्रदान गर्नेछ ।