एजेन्सी – साविक विजेता गुजरात टाइटन्सले इन्डियन प्रिमियर लिग (आइपिएल) २०२३ को पहिलो खेलमा चेन्नई सुपर किंग्सलाई ५ विकेटले हराउँदै विजयी सुरुवात गरेको छ । जितको लागि १ सय ८० रनको विजयी लक्ष्य पछ्याएको गुजरातले १९.२ ओभरमा ५ विकेट गुमाउँदै पूरा गर्यो ।

गुजरातलाई जितको लागि अन्तिम १२ बलमा २३ रन चाहिँएको थियो । तीव्र गतिका बलर दीपक चाहरले १९ औं ओभरमा १५ रन खर्चिएपछि जितको सम्भावना टाढिएको थियो । १९ औं ओभरको दोस्रो बलमा लेग वाइको रुपमा चौका गएको थियो । चौथो बलमा राशिद खानले छक्का र पाँचौं बलमा चौका प्रहार गर्दै जित नजिक पुर्याए ।

राहुल टेवाटियाले अन्तिम ओभरमा ८ रन चाहिँदा पहिलो बलमा तुषारदेश पाण्डेलाई छक्का र दोस्रो बलमा चौका प्रहार गर्दै खेल सकाएका थिए । गुजरातका शुभमन गिल ३६ बलमा ६ चौका र ३ छक्कासहित ६३ रनमा आउट भए ।

ऋद्धिमान शाह १६ बलमा २ चौका र २ छक्कासहित २५, साई सुदर्शन २२, हार्दिक पान्ड्या ८ र विजय शंकर २७ रनमा आउट भए । राहुल टेवाटिया १५ र राशिद खान १० रनमा अविजित रहे ।

डेब्यू खेलमा चेन्नईका तीव्र गतिका बलर राजवर्धन हांगरगेकरले ४ ओभरमा ३६ रन खर्चेर सर्वाधिक ३ विकेट लिए । तुषार देशपाण्डे र रविन्द्र जडेजाले एक एक विकेट लिए ।

त्यसअघि नरेन्द्र मोदी स्टेडियम अहमदाबादमा टस हारेर पहिला ब्याटिङको निम्तो पाएको चेन्नईले निर्धारित २० ओभरमा ७ विकेट गुमाउँदै १ सय ७८ रन बनाएको थियो ।

चेन्नईका युवा ओपनर ऋतुराज गायकवाडले ५० बलमा ४ चौका र ९ छक्कासहित ९२ रनको सानदार इनिङ खेलेपनि टोलीको जितको लागि पर्याप्त हुन सकेन । ऋतुराज बाहेक अन्य ब्याटरले भने राम्रो प्रदर्शन गर्न सकेनन् ।

गायकवाड तीव्र गतिका बलर अल्जारी जोशेफको १८ औं ओभरको पहिलो फुलटस बलमा छक्का हान्ने धुनमा लङअनमा शुभमन गिलबाट क्याच आउट भएपछि शतक बनाउन ८ रनले चुकेका थिए ।

तीव्र गतिका बलर मोहम्मद शामीले तेस्रो ओभरको दोस्रो बलमा ओपनर डेभन कन्वेलाई एक रनमा बोल्ड गरेका थिए । मोईन अली १७ बलमा ४ चौका र १ छक्कासहित २४ रनमा क्याच आउट भए । अली राशिद खानको बलमा ऋद्धिमान शाहबाट क्याच आउट भए ।

राशिद खानको बलमा चेन्नईका प्रमुख ब्याटर बेन स्टोक्स एज लागेर शाहबाट क्याच आउट हुन पुगेपछि विशाल योगफल कठिन देखिएको थियो । स्टोक्सले ६ बलमा १ चौकासहित ७ रन बनाए । बायाँ हाते तीव्र गतिका बलर जोशुवा लिटिलले अम्बाती रायुडूलाई १२ रनमा बोल्ड गरे । लिटिल आयरल्यान्डबाट आइपिएल खेल्ने पहिलो खेलाडी हुन् ।

शिबम दुबे १८ बलमा १ छक्कासहित १९, रविन्द्र जडेजा १ रनमा आउट भए । कप्तान महेन्द्रसिंह धोनी ७ बलमा १ चौका र १ छक्कासहित १४ रनमा अविजित रहेका थिए ।

गुजरातका राशिद खानले ४ ओभरमा २६ रन खर्चेर २ विकेट लिए । राशिद खान प्लेयर अफ द म्याच चुनिए । मोहम्मद शामीले ४ ओभरमा २९ रन खर्चेर २ विकेट लिए । अल्जारी जोशेफले ४ ओभरमा ३३ रन खर्चेर २ विकेट लिए । जोशुवा लिटिलले ४ ओभरमा ४१ रन खर्चेर १ विकेट लिए ।

चेन्नईले सोमबार लखउन सुपर जायन्ट्ससँग खेल्नेछ । गुजरातले बुधबार दिल्ली क्यापिटल्ससँग खेल्नेछ । आइपिएलमा आज दुई खेल हुँदैछन् । पहिलो खेलमा दिउँसो ३ : ४५ मा पन्जाब सुपर किंग्स र कोलकता नाइट राइडर्सबीच प्रतिस्पर्धा हुँदैछ । साँझ ७ ः १५ मा लखनउ सुपर जायन्ट्स र दिल्ली क्यापिटल्स भिड्दैछन् ।