एजेन्सी – तिलक बर्माको सानदार ब्याटिङमा मुम्बई इन्डियन्सले इन्डियन प्रिमियर लिग (आइपिएल) २०२३ को पाँचौं खेलमा रोयल च्यालेन्जर्स बेंगलोरलाई १ सय ७२ रनको प्रतिस्पर्धात्मक लक्ष्य दिएको छ ।

चिन्नास्वामी रंगाशालामा टस हारेर पहिला ब्याटिङको निम्तो पाएको मुम्बईले निर्धारित २० ओभरमा ७ विकेट गुमाउँदै १ सय ७१ रन बनायो । मुम्बईका बायाँ हाते अलराउन्डर तिलक बर्मा ४६ बलमा ९ चौका र ४ छक्कासहित ८४ रनमा अविजित रहे । एक समय १०५-६ को दयनीय अवस्थामा पुगेको मुम्बईलाई तिलकले प्रतिस्पर्धात्मक योगफलमा पुर्याएका थिए ।

तिलक बाहेक अन्य कुनैपनि ब्याटरले राम्रो प्रदर्शन गर्न सकेनन् । मुम्बईको सुरुवात खराब रह्यो । तीव्र गतिका बलर मोहम्मद शिराजले तेस्रो ओभरको तेस्रो बलमा ओपनर ईशान किशनलाई १० रनमा क्याच गराए । कप्तान रोहित शर्मा १० बल खेल्दै एक रनमा आउट भए । रोहित आकाश दीपको बलमा आउट साइड एज लागेर विकेटकिपर दीनेश कार्तिकबाट क्याच आउट भएका थिए ।

क्यामरन ग्रीनलाई रिस टोप्लीले ५ रनमा बोल्ड गरे । माइकल ब्रेसवेलको बलमा सूर्यकुमार यादव १५ रनमा क्याच आउट भएपछि मुम्बई ८.५ ओभरमा ४८-४ को दयनीय अवस्थामा पुगेको थियो । पाँचौं विकेटका लागि तिलक र डेब्यू खेल खेलेका नेहल वढेराले ३० बलमा ५० रनको साझेदारी गर्दै खेलमा फर्काएका थिए ।

स्पिनर कर्ण शर्माको १४ औं ओभरको पाँचौं बलमा लगातार तीन छक्का हान्ने धुनमा वढेरा लङअनमा विराट कोहलीबाट क्याच आउट भए । उनले १३ बलमा १ चौका र २ छक्कासहित २१ रन बनाए ।

टिम डेविड शर्माको बलमै ४ रनमा बोल्ड हुँदा मुम्बई १५.३ ओभरमा १०५-६ को दयनीय अवस्थामा पुगेको थियो । अर्शद खान ९ बलमा १ छक्कासहित १५ रनमा अविजित रहे ।

बेंगलोरका कर्ण शर्माले ४ ओभरमा ३२ रन खर्चेर २ विकेट लिए । मोहम्मद शिराज, रिस टोप्ली, आकाश दीप, हर्षल पटेल र माइकल ब्रेसवेलले एक एक विकेट लिए ।