एजेन्सी – अलराउन्डर मोईन अलीको उत्कृष्ट बलिङमा चेन्नई सुपर किंग्सले इन्डियन प्रिमियर लिग (आइपिएल) २०२३ को छैटौं खेलमा लखनऊ सुपर जायन्ट्सलाई १२ रनले पराजित गरेको छ । चेन्नईको यो पहिलो जित हो । जितको लागि २ सय १८ रनको विशाल विजयी लक्ष्य पछ्याएको लखनऊले निर्धारित २० ओभरमा ७ विकेट गुमाउँदै २ सय ५ रन बनायो ।

लखनऊका बायाँ हाते ओपनर कायल मेयर्सले २२ बलमा ८ चौका र २ छक्कासहित ५३ रनको विष्फोटक अर्धशतक प्रहार गरेपनि जितको लागि पर्याप्त हुन सकेन । उनी आइपिएल इतिहासमा सुरुवाती दुबै खेलमा अर्धशतक प्रहार गर्ने पहिलो खेलाडी बनेका छन् । मेयर्सले पहिलो खेलमा दिल्ली क्यापिटल्सविरुद्ध ७३ रनको इनिङ खेलेका थिए ।

लखनऊलाई ओपनर मेयर्स र कप्तान लोकेश राहुलले पहिलो विकेटका लागि मात्रै ५.३ ओभरमा ७९ रनको विष्फोटक सुरुवात गर्दै चेन्नईलाई दबाबमा राखेका थिए । मोईन अलीको बलिङ सामु लखनऊका ब्याटरले क्रिजमा धेरै समय टिक्न सकेनन् ।

अलीको बलमा ठूलो सट खेलेका मेयर्स डिप मिडविकेटमा डेभन कन्वेबाट क्याच आउट भए । उक्त विकेट चेन्नईको जितको टर्निङ प्वाइन्ट बन्यो । मिचेल सान्टनरको बलमा अर्को ओभरमा दीपक हुडा दुई रनमा डिप मिडविकेटमा नै बेन स्टोक्सबाट क्याच आउट भए ।

अलीको आठौं ओभरको दोस्रो बलमा लोकेश राहुल डिप मिडविकेटमै ऋतुराज गायकवाडबाट २० रनमा क्याच आउट भएपछि लखनऊ दबाबमा परेको थियो । राहुलले १८ बलमा २ चौका प्रहार गरे । मोईन अलीकै बलमा क्रुनाल पान्ड्या ९ रनमा आउट भए । मोईन अलीले मार्कस स्टोइनिसलाई १४ औैं ओभरको दोस्रो बलमा २१ रनमा बोल्ड गरे ।

तुषार देशपान्डेको १६ औं ओभरको अन्तिम बलमा निकोलस पुरन बेन स्टोक्सबाट क्याच आउट भएपछि लखनऊको जितको सम्भावना टाढिएको थियो । पुरनले १८ बलमा २ चौका र ३ छक्कासहित ३२ रन बनाए ।

आयुष बदोनी २३ र कृष्णप्पा गौतमले १७ रन बनाए । मार्क वुडले ३ बलमा १ चौका र १ छक्कासहित १० रनमा अविजित रहे । अन्तिम दुई बलमा तुषारलाई चौका र छक्का प्रहार गरेपनि त्यो जितको लागि पर्याप्त हुन सकेन ।

चेन्नईका मोईन अलीले ४ ओभरमा २६ रन खर्चेर ४ विकेट लिए । मिचेल सान्टनारले ४ ओभरमा २१ रन खर्चेर १ विकेट लिए । तुषार देशपान्डेले ४ ओभरमा ४५ रन खर्चेर २ विकेट लिए ।

त्यसअघि घरेलु मैदान एमए चिदम्बरम रंगशालामा टस हारेर पहिला ब्याटिङको निम्तो पाएको चेन्नईले निर्धारित २० ओभरमा ७ विकेट गुमाउँदै २ सय १७ रन बनाएको थियो । चेन्नईको जितमा युवा ओपनर ऋतुराज गायकवाडले ३१ बलमा ३ चौका र ४ छक्कासहित सर्वाधिक ५७ रनको योगदान दिए।

गायकवाड र डेभन कन्वेले पहिलो विकेटका लागि ९.१ ओभरमा १ सय १० रनको सानदार शतकीय सुरुवात दिलाएका थिए । पहिलो खेलमा गुजरात टाइटन्सविरुद्ध ५० बलमा ४ चौका र ९ छक्कासहित ९२ रन जोेडेका ऋतुराज दोस्रो खेलमा पनि त्यहिँ लयलाई निरन्तरता दिए । उनले पहिलो खेलमा २३ बल र दोस्रो खेलमा २५ बलमा अर्धशतक पूरा गरे ।

अर्का ओपनर डेभन कन्वे २९ बलमा ५ चौका र २ छक्कासहित ४७ रनमा आउट भए । मार्क वुडको ११ औं ओभरको दोस्रो सट बलमा बलमा कन्वे क्रुनाल पान्ड्याबाट क्याच हुन पुगेका थिए । लामो दौडका साथ पान्ड्याले उत्कृष्ट क्याच लिएका थिए ।

शिवम दुबे १६ बलमा १ चौका र ३ छक्कासहित २७ रनमा आउट भएका थिए । दुबे बिश्रोईको बलमा टप एज लागेर क्याच आउट भए । मोईन अली १३ बलमा ३ चौकासहित १९ रनमा विश्रोईको बलमा विकेटकिपर निकोलस पुरनबाट स्टम्पिङ आउट भए ।

बेन स्टोक्स ८ बलमा १ चौकासहित ८ रनमा आउट भए । अम्बाती रायुडू १४ बलमा २ चौका र २ छक्कासहित २७ रनमा अविजित रहे । महेन्द्रसिंह धोनी ३ बलमा २ छक्कासहित १२ रनमा क्याच आउट भए ।

लखनऊका रबि विश्रोईले ४ ओभरमा २८ रन खर्चेर ३ विकेट लिए । पहिलो खेलमा मार्क वुडले दिल्लीविरुद्ध ४ ओभरमा १४ रन खर्चेर ५ विकेट लिएका थिए । चेन्नईविरुद्ध भने वुडले ४ ओभरमा ४९ रन खर्चेर ३ विकेट लिए । आवेश खानले एक विकेट लिए ।

लखनऊले पहिलो खेलमा दिल्लीलाई ५० रनले हराएको थियो । चेन्नई पहिलो खेलमा गुजरात जायन्ट्ससँग ५ विकेटले पराजित भएको थियो । चेन्नईले अव शनिबार मुम्बई इन्डियन्ससँग खेल्नेछ ।

मुम्बई पहिलो खेलमा बेंगलोरसँग ८ विकेटले पराजित भएको थियो । लखनऊले अव शनिबार सनराइजर्स हैदराबादसँग खेल्नेछ । हैदराबाद पहिलो खेलमा राजस्थान रोयल्ससँग ७२ रनले पराजित भएको थियो । मंगलबार(भोली) दिल्ली क्यापिटल्स र गुजरात टाइटन्सबीच अरुण जेट्ली स्टेडियम दिल्लीमा प्रतिस्पर्धा हुनेछ ।