एजेन्सी – इन्डियन प्रिमियर लिग (आइपिएल) २०२३ को सातौं खेलमा आज दिल्ली क्यापिटल्स र गुजरात टाइटन्सबीच प्रतिस्पर्धा हुँदैछ । खेल नेपाली समय अनुसार साँझ ७: ४५ मा दिल्लीको घरेलु मैदान अरुण जेट्ली रंगाशालमा सुरुहुनेछ।

दिल्ली पहिलो जितको खोजीमा हुनेछ । साविक विजेता गुजरात लगातार दोस्रो जित हात पार्ने सोचमा हुनेछ । दिल्ली पहिलो खेलमा लखनऊ सुपर जायन्ट्ससँग ५० रनले पराजित भएको थियो । गुजरातले पहिलो खेलमा चेन्नईलाई ५ विकेटले हराएको थियो ।

दिल्लीमा तीव्र गतिका बलर एनरिच नोर्किया आजको खेलमा उपलब्धी हुनेछन् । उनी फर्किदा दिल्लीको बलिङ आक्रामण मजबुत हुनेछ । दिल्लीमा डेविड वार्नर, पृथ्वी शा र रोभम्यान पावेल जस्ता स्टार ब्याटर छन् । दिल्लीको ओपनिङ पृथ्वी शा र वार्नरले गर्नेछन् । यी दुईबाट उत्कृष्ट सुरुवात चाहन्छ ।

मिचेल मार्श तेस्रो नम्बरमा खेल्नेछन् । पहिलो खेलमा गोल्डेन डक आउट भएपनि दोस्रो खेलमा उनीबाट राम्रो प्रदर्शनको अपेक्षा गरिएको छ । राइली रोसोउ चौथो र शरफराज खान पाँचौं नम्बरमा खेल्नेछन् । रोसोउको प्रदर्शन मध्यक्रममा निर्भर हुनेछ । रोभम्यान पावेल र अक्षर पटेल फिनिसर हुन् । वेस्टइन्डिजका सिमित ओभरका कप्तान पावेल विष्फोटक ब्याटिङका लागि चिनिन्छन् ।

स्पिनरमा अक्षर र कुलदीप यादवको जोडी हुनेछ । नोर्किया टोलीमा फर्किदा चेतन सकारिया बेन्चमा बस्ने सम्भावना छ । दिल्लीको तीव्र गतिको बलरमा खलिल अहमद, मुकेश कुमार र एनरिच नोर्किया हुनेछन् ।

यता गुजरातको ओपनरमा ऋद्धिमान शाह र शुभमन गिल हुनेछन् । गिल राम्रो लयमा छन् । चेन्नईलाई हराउन अर्धशतक हानेका गिल दोस्रो खेलमा पनि ठूलो इनिङ खेल्न सक्छन् । केन विलियम्सन घाइते हुँदै पूरै आइपिएल नै गुमाउनेछन् । विलियम्सनको स्थानमा डेविड मिलर खेल्नेछन् । मिलर गुजरातका प्रमुख ब्याटर हुन् । हार्दिक पान्ड्याले मध्यक्रम सम्हाल्ने छन् । विजय शंकर र साई सुदर्शनले पनि मध्यक्रममा खेल्नेछन् ।

गुजरातको तीव्र गतिका बलरमा अल्जारी जोशेफ, मोहम्मद शामी र जोशुवा लिटिल हुनेछन् । यश दयालको स्थानमा आज गुजरातले जयन्त यादवलाई मौका दिनसक्छ । दिल्लीको पिच स्पिनर सहयोगी मानिन्छ । स्पिनर राशिद खानको प्रदर्शन गुजरातको लागि निकै महत्वपूर्ण हुनेछ । यी दुई टोलीबीच एकमात्रै खेल भएको छ । गतवर्ष गुजरातले दिल्लीलाई १४ रनले हराएको थियो ।