काठमाडौं (हाम्रो खेलकुद) – बहराइनले एसिसी प्रिमियर कपमा सिंगापुरलाई १ सय ३२ रनको फराकिलो अन्तरले पराजित गर्दै सानदार विजयी सुरुवात गरेको छ । जितको लागि २ सय ८७ रनको विशाल विजयी लक्ष्य पछ्याएको सिंगापुर ४३.१ ओभरमा १ सय ५४ रनमा अल आउट भयो ।

सिंगापुरका सुरेन्द्र चन्द्रमोहनले ६६ बलमा ४ चौका र १ छक्कासहित सर्वाधिक ५१ रन बनाए । अन्य कुनैपनि ब्याटरले राम्रो प्रदर्शन गर्न सकेनन् ।

बहराइनका इमरान अनवारले ९ ओभरमा २४ रन खर्चेर सर्वाधिक ४ विकेट लिए । रिजवान बुटले ९.१ ओभरमा २ मेडनसहित ३८ रन खर्चेर ३ विकेट लिए । अब्दुल मजिदले १० ओभरमा २ मेडनसहित २३ रन खर्चेर २ विकेट लिए ।

त्यसअघि टियु क्रिकेट मैदानमा टस जितेर पहिला ब्याटिङ थालेको बहराइनले ५० ओभरमा ८ विकेट गुमाउँदै २ सय ८६ रन बनाएको थियो । बहराइनका फैज अहमदले ५९ बलमा ९ चौका र १ छक्कासहित सर्वाधिक ७९ रनको योगदान दिए । ओपनर शाहवाद बाडरले ९८ बलमा ८ चौका र १ छक्कासहित ७६ रन बनाए ।

अर्का ओपनर मोहम्मद युनिस २४ बलमा ५ चौकासहित २३, डेविड मथिस शून्य, सोहिल अहमद ४६ र कप्तान हैदर अली २९ रनमा आउट भए । एक समय ३२-२ को अवस्थामा पुगेको बहराइनलाई तेस्रो विकेटका लागि शाहजाद र सोहिलले १ सय ६ रनको सानदार शतकीय साझेदारी गरेका थिए । पाँचौं विकेटका लागि फैज अहमद र हैदर अलीले ६६ रनको साझेदारी गरेपछि विशाल योगफलको आधार तय गरेका थिए ।

सिंगापुरका रमेश कलिमुथु, थिलिपन र विनोथ भास्करणले समान दुई विकेट लिए ।बहराइनले अव शनिबार मुलपानीमा कुवेतसँग खेल्नेछ । सिंगापुर पहिलो खेलमा हङकङसँग ८ विकेटले पराजित भएको थियो । सिंगापुरले आइतबार युएईसँग कीर्तिपुरमा खेल्नेछ ।

एसिसी प्रिमियर कपमा समूह ए मा घरेलु टोली नेपालसँगै ओमान, कतार, मलेसिया र साउदी अरब छन् । समूह बी मा युएई, हङकङ, कुवेत, सिंगापुर र बहराइन छन् ।

प्रतियोगिता सेमिफाइनल, फाइनल हुँदै उपाधि जित्ने टोलीले आगमी सेप्टेम्बरमा पाकिस्तानमा हुने एसिया कप खेल्न पाउनेछन् । एसिया कपमा समूह ए मा भारत, पाकिस्तान र प्रिमियर कप विजेता टोली हुनेछन् । समूह बी मा बंगलादेश, अफगानिस्तान र श्रीलंका छन् ।