काठमाडौं (हाम्रो खेलकुद) – नेपालका युवा ब्याटर भीम सार्कीले एसिसी प्रिमियर कपमा ओमानविरुद्ध चौका प्रहार गर्नेक्रममा ब्याट भाँचिएको छ । बायाँ हाते तीव्र गतिका बलर बिलाल खानको नवौं ओभरको चौथो बलमा फाइन लेगमा चौका प्रहार गर्नेक्रममा भीमको ब्याट भाँचिएको हो ।

टियु मैदानमा टस हारेर पहिला ब्याटिङको निम्तो पाएको नेपालले १० ओभरमा २ विकेट गुमाउँदै ३० रन बनाएको छ । नेपालका भीम सार्की २७ बलमा २ चौका र १ छक्कासहित १८ रनमा क्रिजमा छन् ।

उनलाई कप्तान रोहित पौडेलले १५ बलमा १ चौकासहित १२ रनमा साथ दिएका छन् । नेपालले खाता नखोल्दै दुवै ओपनर आसिफ शेख र कुशल भुर्तेललाई गुमाएको थियो ।

नेपालले पहिलो रन २८ औं बलमा खोलेको थियो । सुरुवाती २७ बल सम्म नेपालले दुबै ओपनरमा गुमाउँदै कुनैपनि रन जोडेको थिएन । बिलाल खानको पाँचौं ओभरको चौथो बलमा खाता खोलेको थियो । भीम सार्कीले मिडअफमा सट प्रहार गर्दै नेपालको पहिलो रनको खाता खोलेका थिए ।

नेपालले तेस्रो ओभरको दोस्रो बलमा ओपनर कुशल भुर्तेललाई खाता नखोल्दै गुमाएको थियो । टियु एण्डबाट आएका तीव्र गतिका बलर बिलाल खानको बलमा कुशल एलबीडब्लू आउट भएका थिए ।

चोभार एण्डबाट आएका कलिमुल्लाहको चौथो ओभरको चौथो बलमा आसिफ शेख बोल्ड आउट भए । आसिफले १० र कुशलले ८ बल खेल्दा रन जोड्न सकेनन् ।