एजेन्सी – दिल्ली क्यापिटल्सका अलराउन्डर मिचेल मार्श इन्डियन प्रिमियर लिग (आइपिएल) २०२३ को ४० औं खेलमा सनराइजर्स हैदराबादविरुद्ध हारको बाबजुद प्लेयर अफ द म्याच चुनिएका छन् । दिल्ली ९ रनले पराजित भएपनि मिचेल मार्शले ब्याटिङ र बलिङ दुबैमा सानदार प्रदर्शन गरेपछि खेलको प्लेयर अफ द म्याच चुनिएका हुन् ।

जितको लागि १ सय ९८ रनको विशाल लक्ष्य पछ्याएको दिल्लीले २० ओभरमा ६ विकेट गुमाउँदै १ सय ८८ रन मात्रै बनाउन सक्यो । दिल्लीका मिचेल मार्शले ३९ बलमा १ चौका र ६ छक्कासहित ६३ रन बनाएपनि टोलीको हार टार्न सकेनन् ।

अर्का ओपनर फिलिप साल्ट ३५ बलमा ९ चौकासहित ५९, डेविड वार्नर डक, मनिष पाण्डे एक, प्रियम गर्ग १२ र शरफराज खान ९ रनमा आउट भए । अक्षर पटेल १४ बलमा १ चौका र २ छक्कासहित २९ र रिपल पटेलले ११ रन बनाए ।

हैदराबादका स्पिनर मयंक मारकन्डेले ४ ओभरमा २० रन खर्चेर २ विकेट लिए । भुवनेश्वर कुमार, अकिल हुसैन, टि नटराजन, अभिषेक शर्माले समान एक विकेट लिए ।

त्यसअघि अरुण जेट्ली स्टेडियम दिल्लीमा टस जितेर पहिला ब्याटिङको निम्तो पाएको हैदराबादले निर्धारित २० ओभरमा ६ विकेट गुमाउँदै १ सय ९७ रन बनाएको थियो । हैदराबादका अभिषेक शर्माले ३६ बलमा १२ चौका र १ छक्कासहित ६७, मयंक अग्रवाल ५, राहुल त्रिपाठ १०, एडम माक्ररम ८ र ह्यारी ब्रुक डक आउट भए ।

हेनरक क्लासेन २७ बलमा २ चौका र ४ छक्कासहित ५३, अब्दुल सामद २८ र अकिल हुसैनले १६ रन बनाए । दिल्लीका मिचेल मार्शले ४ ओभरमा १ मेडनसहित २७ रन खर्चेर ४ विकेट लिएपनि टोलीको हार टार्न सकेनन् । अक्षर पटेल र ईशान्त शर्माले समान एक विकेट लिए ।

दिल्ली ८ खेलमा २ मा जित र ४ मा हारसहित पुछारमा छ । दिल्ली प्लेअफमा पुग्न अव बाँकी सबै खेल जित्नुपर्ने हुन्छ । हैदराबाद ८ खेलमा ३ मा जित र ५ मा हारसहित ६ अंकका साथ आठौं स्थानमा छ । गुजरात ८ खेलमा ६ मा जितसहित १२ अंकका साथ शीर्ष स्थानमा छ ।