काठमाडौं (हाम्रो खेलकुद) – नेपालले एसिसी प्रिमियर कपको फाइनल खेलमा आज युएईसँग खेल्दैछ । खेल बिहान ९ बजे टियु क्रिकेट मैदानमा सुरुहुनेछ । यस खेलको विजेता टोलीले आगमी सेप्टेम्बरमा घरेलु टोली पाकिस्तान र भारतसँग खेल्न पाउनेछ ।

तर आज काठमाडौंमा मौसम पूर्वअनुमानका अनुसार भारी वर्षा हुने सम्भावना छ । खेल सुरु हुने समयमा विहान ९ बजे ७८ प्रतिशत वर्षा हुने सम्भावना छ । दिउँसो ३ बजेसम्म ८७ प्रतिशत सम्म वर्षा हुने सम्भावना छ ।

दिउँसो ४ बजेपछि विस्तारै घट्नेछ । तर वर्षा भने रोकिने सम्भावना कम रहन्छ । खेलको कट अफ टाइम (अन्तिम बल खस्ने समय) ५ : २४ छ । त्यसैले दुबै टोलीलाई वर्षाको चिन्ता छ । पछिल्लो तीन दिनदेखी काठमाडौंको आकाश पुरै कालो बादलले ढाकेको छ ।

नेपाल समूह ए को विजेता हुँदै फाइनलमा स्थान पक्का गरेको हो । कुवेतसँगको सेमिफाइनल खेल वर्षाको कारण नतिजा विहीन बनेपछि नेपाल समूह विजेताको रुपमा फाइनलमा पुगेको थियो । उता युएईले सेमिफाइनलमा ओमानलाई दुई रनले हराउँदै फाइनलमा स्थान बनाएको हो । अन्तिम बलमा विकेट लिदै रोमान्चक रुपमा फाइनलमा पुगेको थियो ।

यदि वर्षाको कारण आज खेल रोकिएमा मंगलबार पनि हुनेछ । खेल जहाँबाट रोकिएको छ मंगलबार त्यहिबाट सुरुवात गर्नुपर्ने हुन्छ । मंगलबार पनि वर्षाको सम्भावना छ । मौसम पूर्वअनुमानका अनुसार आगमी विहीबार सम्म वर्षाको सम्भावना छ ।

मंगलबार पनि खेल हुन नसके सुपर ओभरमा जानेछ । डकवर्थ लेविस पद्धतिको आधारमा नतिजा निकाल्न दोस्रो ब्याटिङ गर्ने टोलीले २० ओभर खेलेको हुनुपर्छ । दोस्रो टोलीले २० ओभर खेलेको छैन भने नतिजा आउँदैन । यदि मंगलबार पनि नतिजा आउन सकेन भने खेल सुपर ओभरबाट विजेता घोषणा गर्ने प्रयास अम्पायरले गर्नेछन् ।

तर सुपर ओभर पनि गर्ने अवस्था नरहेमा नेपाल एसिया कपमा पुग्नेछ । नियम अनुसार ओडिआई वरियतामा माथि रहने टोलीले एसिया कप खेल्न पाउनेछ । नेपाल ओडिआई वरियतामा १४ औं र युएई १९ औं स्थानमा छ ।