काठमाडौं (हाम्रो खेलकुद) – लगातार वर्षासँगै एसिसी प्रिमियर कपको फाइनलमा आज युएई र नेपालबीचको खेल नहुने उच्च सम्भावना छ । टियु क्रिकेट मैदानमा टस हारेर पहिला ब्याटिङको निम्तो पाएको युएई २७.३ ओभरमा ९ विकेट गुमाउदै १ सय ६ रन बनाएको अवस्थामा लगातार वर्षा भएको छ ।

तर वर्षाको कारण दुई घण्टा भन्दा बढी खेल हुन सकेको छैन । टियुमा अहिले पनि वर्षा जारी छ । त्यसैको कारण आज खेल नहुने उच्च सम्भावना छ । अम्पायरले केहि समयमा आधिकारीक रुपमा बताउनेछन् ।

आज खेल पुन सुरु हुन नेपालले कम्तिमा २० ओभर ब्याटिङ गर्ने समय हुनुपर्छ । कम्तिमा पनि मैदान सुकाउन एक घण्टा समय लाग्नेछ । २० ओभर ब्याटिङ गर्न कम्तिमा पनि एक घण्टा समय लाग्छ । खेलको कट अफ टाइम अर्थात अन्तिम बल खस्ने समय ५ : २४ छ । निरन्तर वर्षा भएको छ ।

वर्षा रोकिएपनि अव खेल हुने सम्भावना निकै कम रहन्छ । खेल हुने सम्भावना नदेखेपछि दर्शकपनि फर्किन थालेका छन् । दुबै टोलीका खेलाडी डग आउटमा छन् । मैदानको अधिकाम्स ठाउँमा कभरले ढाकिएको छ । आज नहुँदा मंगलबार हुनेछ । मंगलबार युएईले १०६–९ को अवस्थाबाट खेल सुरु गर्नेछ । मंगलबार पनि वर्षाको सम्भावना छ । मंगलबार नतिजा आउन नसकेमा सुपर ओभरबाट नतिजा निकाल्नु पर्ने हुन्छ । यदि वर्षाको कारण सुपर ओभर पनि हुन नसकेन भने नेपाल एसिया कपमा पुग्नेछ ।

सुपर ओभर पनि वर्षाको कारण हुन नसके ओडिआई वरियताको कारण नेपाल एसिया कपमा पुग्नेछ । नेपाल ओडिआई वरियाता १४ औं र युएई १९ औं स्थानमा छन् । नेपालका स्पिनर ललित नारायण राजवंशी ह्याट्रिक नजिक छन् । युएईका आसिफ खान सर्वाधिक ४६ रनमा आउट भए ।

उनी स्पिनर ललित नारायण राजवंशीको २८ औं दोस्रो बलमा आसिफ खान एज लागेर आरिफ शेखबाट क्याच आउट भए । उनले ५४ बलमा ७ चौका र १ छक्का प्रहार गरे । लगत्तै अर्को बलमा जहुर खान स्लिपमा क्याच आउट भए । तर ह्याट्रिक बलमा भने पानी परेपछि पिच कभरले ढाक्न बोलाएका थिए । त्यसपछि वर्षा रोकिएको छैन ।