एजेन्सी – भारतीय दुई चर्चित क्रिकेटर विराट कोहली र गौतम गम्भीरबीच फेरि झगडा भएको छ । इन्डियन प्रिमियर लिग (आइपिएल) २०२३ को ४३ औं खेलमा रोयल च्यालेन्जर्स बेंगलोरका प्रमुख ब्याटर विराट कोहली र लखनऊ सुपर जायन्ट्सका मेन्टर गौतम गम्भीरबीच झगडा भएको छ।

यी दुई क्रिकेटरबीच पहिला देखिनै राम्रो सम्बन्ध छैन । सोमबार राती कम स्कोरको खेलमा बेंगलोरले लखनऊलाई १८ रनले पराजित गर्यो । जितको लागि १ सय २७ रनको विजयी लक्ष्य पछ्याएको लखनऊ १९.५ ओभरमा १ सय ८ रनमा अल आउट भयो ।

खेलको समयमा कोहलीले निकै आक्रामक सेलेब्रेसन गरेका थिए । यसअघि बेंगलोरको घरेलु मैदान चिन्नास्वामीमा लखनऊले २ सय १३ रनको विजयी लक्ष्य पूरा गर्दा गौतम गम्भीरले बेंगलोरका समर्थकलाई चुप रहन भन्दै सेलेब्रेसन गरेका थिए । कोहलीले पनि त्यसको जवाफ दिँदै सोमबार राती लखनऊका क्रुनाल पान्ड्या आउट भएपछि सेलेब्रेसन गरेका थिए ।

लखनऊका समर्थकलाई पनि कोहलीले चुप रहन सेलेब्रेसन गरेका थिए । खेल सकिएपछि भने गम्भीर र कोहलीको झगडानै हुन पुग्यो । खेल सकिएपछि लखनऊका तीव्र गतिका बलर नविन उल हकले कोहलीसँग हात मिलाउँदा नै केहि भनाभन गरेका थिए ।

नविन उल हकले कोहलीसँग खेल भावना विपरित व्यहवहार गर्दै हात फाल्न पुगेका थिए । कोहली केहि आक्रोश बनेपनि संयमितका साथ लखनऊका खेलाडीसँग हात मिलाउन गएका थिए । कोहली र गम्भीरले पनि हात मिलाएका थिए । त्यो समय सम्म झगडा भएको थिएन ।

कोहलीसँग लखनऊका कायल मेयर्सले कुराकानी गरेका थिए । त्यसैक्रममा गम्भीरले मेयर्सलाई कोहलीसँग कुरा नगर्न भन्दै लगेर गएका थिए । त्यहिँबाट झगडा सुरु भएको थियो । कोहली त्यसैको कारण निकै आक्रोशित हुँदै गम्भीरलाई केहि भन्न पुगेका थिए । त्यसपछि गम्भीर पनि फर्किएर पुन कोहलीसँग गएपछि झगडा सुरु भएको थियो ।

गम्भीर र कोहलीबीच केहि समय सम्म भनाभननै चलेको थियो । तर पछि गम्भीरलाई लखनऊका कप्तान लोकेश राहुल लगायतका खेलाडीले झगडा नगर्न भन्दै त्यहाँबाट लगेर गएका थिए ।

कोहली र गम्भीरबीच २०१३ को आइपिएलमा पनि ठूलो झगडा परेको थियो । भारतीय पूर्व चर्चित ओपनर गम्भीर र कोहलीबीच ब्यक्तिगत रुपमा राम्रो सम्बन्ध छैन । सोमबार राती झगडा गरेपछि यी दुई खेलाडीलाई आइपिएलले १०० प्रतिशत म्याच फि जरिवना लगाएको छ । त्यस्तै नविन उल हकललाई खेलको ५० प्रतिशत जरिवना लागेको छ ।