एजेन्सी – रोयल च्यालेन्जर्स बेंगलोरले इन्डियन प्रिमियर लिग (आइपिएल) २०२३ को ५० औं खेलमा दिल्ली क्यापिटल्सलाई १ सय ८२ रनको बलियो लक्ष्य दिएको छ । अरुण जेट्ली स्टेडियम दिल्लीमा टस जितेर पहिला ब्याटिङ रोजेको बेंगलोरले निर्धारित २० ओभरमा ४ विकेट गुमाउँदै १ सय ८१ रन बनायो ।

बेंगलोरका युवा खेलाडी महिपाल लोमरोर २९ बलमा ६ चौका र ३ छक्कासहित सर्वाधिक ५४ रनमा अविजित रहे । उनको यो आइपिएल करिअरको पहिलो अर्धशतक हो ।

बेंगलोरलाई ओपनर विराट कोहली र फाफ डु प्लेसिसले १०.३ ओभरमा ८२ रनको साझेदारी गर्दै राम्रो सुरुवात दिलाएका थिए । मिचेल मार्शको बलमा डु प्लेसिस डिप कभरमा अक्षर पटेलबाट क्याच आउट भए । उनले ३२ बलमा ५ चौका र १ छक्कासहित ४५ रनमा आउट भए ।

लगत्तै अर्को बलमा ग्लेन म्याक्सवेल विकेटकिपर फिलिप साल्टबाट कट विहाइन्ड हुँदै गोल्डेन डक पेभेलिएन फर्के । विराट कोहली ४६ बलमा ५ चौकासहित ५५ रनमा आउट भए । तीव्र गतिका बलर मुकेश कुमारको बलमा फाइन लेगमा कोहली खलिल अहमदबाट क्याच आउट भए । दीनेश कार्तिक ११ रनमा आउट हुँदा अनुज रावत ८ रनमा नटआउट रहे ।

दिल्लीका मिचेल मार्शले ३ ओभरमा २१ रन खर्चेर २ विकेट लिए । मुकेश कुमारले ३ ओभरमा ३० रन खर्चेर १ विकेट लिए । खलिल अहमदले ४ ओभरमा ४५ रन खर्चेर १ विकेट लिए ।